Х.Нямбаатар: Зам таг түгжирчихсэн юм чинь автобусны буудал дээр хүмүүс хүлээдгээрээ л хүлээнэ биз дээ

Гэрэл зургийг MPA агентлагийн онцгой зөвшөөрөлтэйгөөр ашиглав

Өнөөдөр болсон хэвлэлийн хурлын үеэр Хотын дарга Х.Нямбаатар нийтийн тээврийн автобусны хүрэлцээ, багтаамжийн талаар мэдээлэл өглөө. 

Тэрбээр "Одоогийн байдлаар өдөрт 1,200 автобус үйлчилгээнд гардаг. Цаашид өдөрт 2,000 автобус гаргаж болно.

Одоо шинэ, урт оврын, багтаамж ихтэй 31 автобус энэ сарын 25-ны үед нийлүүлэгдэнэ. Эдгээр автобусыг М:1, М:2, М:3 чиглэлд 10, 10-аар нь явуулна. 2014 онд Бат-Үүл даргын үед авсан 10 урт автобусны ашиглалтын хугацаа дуусаж байгаа. 

Зам засаад түгжрэл арилдаг бол энэ жил бүх замыг засаад дуусаж байна.

Улаанбаатар хотод тойрог хурдны зам, метро, метрополитан хотуудад байдаг бүтээн байгуулалт хийгдээгүйгээс 85,000 автомашин зорчих зам дээр 700,000 машин зорчиж, 600,000 хүн амтай байхаар төлөвлөгдсөн хотод хоёр сая хүн амьдарч байна" хэмээн сэтгүүлчийн асуултад хариулах үеэрээ "Зам таг түгжирчихсэн юм чинь автобусны буудал дээр хүмүүс хүлээдгээрээ л хүлээнэ биз дээ, амьдралтай юм ярь л даа" гэв.