ХУУЧИРСАН МЭДЭЭ: 2024/08/05-НД НИЙТЛЭГДСЭН

СЭРЭМЖЛҮҮЛЭГ: Туул, Орхон, Хурх, Балж, Онон гол үерийн аюултай түвшнийг 10-100 см даван үерлэж байна

П.Зоригт, IKON.MN
2024 оны 8 сарын 5
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Голуудын усны түвшин нэмэгдэж байгааг Ус Цаг Уур, Орчны Судалгааны Хүрээлэнгээс сэрэмжлүүлэв. 

Өнөөдрийн байдлаар Сэлэнгэ мөрөн Орхон голын нийт уртын дагууд болон Хангай нурууны араас усжих Хануй, өврийн Завхан, Хэнтий нурууны баруун хажуугийн Ерөө, Туул (Алтанбулаг- Лүн), зүүн хажуугийн Балж, Хэрлэн (Мөнгөнморьт-Багануур-Өндөрхаан) зэрэг голын усны түвшин өмнөх өдрийнхөөс 10-45 см нэмэгдсэн байна.

Түүнчлэн 

  • Хараа (Дархан), Ерөө, Туул (Босгын гүүр- Алтанбулаг), Эг, Улз, Хэрлэн (Хонгон-Чойбалсан), Хануй, Орхон, Онги, Хөгшин Орхон зэрэг гол үерийн түвшнийг 5-35 см
  • Туул (Улаанбаатар-Лүн), Орхон (Орхонтуул), Хурх, Барх, Балж, Онон, Хэрлэн (Мөнгөнморьт-Багануур-Өндөрхаан) , Улз (Дашбалбар), Халх гол Ялалт баг орчимд үерийн аюултай түвшнийг 10-100 см даван тус тус хүчтэй үерлэж байна.

Мөн Алтай нуруунаас эхтэй Ховд, Буянт, Увс нуурын савын Хархираа, Намир гол үерийн түвшнийг 5-10 см давжээ. 

Маргааш буюу наймдугаар сарын 6-нд Сэлэнгэ мөрөн Хялгант баг Сүхбаатар хот орчимд усны түвшин 10-15 см, Орхон голын дунд хэсгээр 30 см, Хэрлэн гол Багануур дүүрэг Өндөрхаан-Чойбалсан хот орчимд 10-15 см  тус тус нэмэгдэх хандлагатай байна.

Иймд дээрх сав голдирол дүүрэн элбэг устай байгаа голуудын саваар нутаглаж буй малчид, аялж амарч яваа ард иргэдийг үерийн аюулаас сэрэмжтэй байхыг онцгойлон анхааруулав.