Б.Золбадрал: Манай улсыг зорих Беларусь, Турк жуулчдын тоо өсөж, барууны орнуудын аялагчид буурсан
"Аялал жуулчлалын судалгаа-2023" эрдэм шинжилгээний хурал Чингис Хаан үндэсний музейд өнөөдөр зохион байгуулагдлаа.
Уг хурлын үеэр "Монгол Улсад 2023 онд аялсан жуулчдын тоон мэдээллийг шинжлэх нь" сэдэвт илтгэлийг Аялал Жуучлалын Мэргэжлийн Холбоо (АЖМХ)-ны Нийтийн эрх зүйн хуулийн этгээд УЗ-ийн дарга Б.Золбадрал танилцуулсан юм.
Үргэлжлүүлэн "Манай улсад Орос, Солонгос улсын жуулчид хамгийн их иржээ. Энэхүү өсөлтийг 2019 оны жуулчдын тоотой харьцуулбал
- Орос 43.4 хувь
- Солонгос 35.6 хувиар тус тус өссөн.
Хамгийн өндөр өсөлттэй орнуудыг харвал Турк сонирхол татаж байна. Тус улсын жуулчдын тоо 191.3 хувийн өсөлт үзүүлжээ. Мөн Беларусь улсаас ирэх жуулчид 102 хувийн өсөлттэй байгаа юм. (2019 онтой харьцуулсан)
Харин манай улсад барууны орнуудаас ирэх жуулчдын өсөлт харьцангуй бага болсон. Жишээлбэл
- АНУ -25 хувь
- Герман -30 хувь
- Австрали -41 хувь
- Их Британи -41 хувиар өөрчлөлт гарчээ" гэв.
График: Монголд зочилсон жуулчдын мэдээлэл (2023.11.29)
Хүснэгт: Монголд зочилсон жуулчдын мэдээлэл
| Улс | Жуулчдын тоо | Хувь |
| ОХУ | 217,386 | 35.04% |
| БНСУ | 139,771 | 22.53% |
| БНХАУ | 125,648 | 20.25% |
| Казахстан | 20,360 | 3.28% |
| Япон | 19,345 | 3.12% |
| АНУ | 14,391 | 2.32% |
| Герман | 8,865 | 1.43% |
| Беларусь | 6,390 | 1.03% |
| Франц | 5,654 | 0.91% |
| Бусад | 62,563 | 10.08% |
АЖМХ-ны Нийтийн эрх зүйн хуулийн этгээд УЗ-ийн дарга Б.Золбадрал "Боомтуудад ямар өөрчлөлт гарч байгааг судалж үзлээ.
Хоёр жуулчны нэг нь агаарын тээврээр манай улсад орж ирж байна.
Монгол Улс 2023 онд түүхэндээ хамгийн өндөр олон улсын агаарын тээврийн зорчигчийн суудлын тоотой байгаа. Жуулчдын 48.6 хувь нь агаарын тээврээр манайд зочилж байна.
Олон улсын зорчигч тээврийн 58.7 хувийг үндэсний тээвэрлэгч компаниуд гүйцэтгэж байгаа.
Өвлийн таван сард жуулчдынхаа 23 хувийг авч байна.Олон улстай харьцуулахад өвлийн аялал жуулчлал маш том зөрүүтэй байгаа юм.
Засгийн газрын өчигдрийн хуралдаанаар үүнтэй холбоотой шийдвэр гарсан.
Манай улсын 135 жуулчны баазад арванхоёрдугаар сарын 1-нээс шөнийн тарифыг дөрвөн сарын хугацаанд тэглэхээр хэлэлцсэн байна.Монголын өвөл тэсгим хүйтэн, цас мөстэй гэдэг боловч өвлийн аялал жуулчлалаа хөгжүүлсэн улс орнуудтай харьцуулахад яг л ижил нөхцөлтэй" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
