О.Лхагва-Очир: Бага насны хүүхдүүд могойг олс гэж андуурах зэргээр таньж мэдээгүйн улмаас хатгуулах тохиолдол гарч байна

Гэрэл зургийг MPA агентлагийн онцгой зөвшөөрөлтэйгөөр ашиглав

Наадмын өдрүүдэд гарсан осол гэмтлийн талаарх мэдээллийг Гэмтэл Согог Судлалын Үндэсний Төв (ГССҮТ)-өөс өнөөдөр өгсөн юм. 

Амралт зугаалгаар явах үедээ могойд хатгуулахаас урьдчилан сэргийлэхийг ГССҮТ-ийн Хүлээн авах яаралтай тусламжийн тасгийн их эмч О.Лхагва-Очир анхааруулав. 

Тэрбээр "Үер буусантай холбоотойгоор могойд хатгуулах тохиолдол их гарч байгаа. Иймд иргэд голын ай сав болон зүлэг ногоо ихтэй газар аялж зугаалахдаа орчноо шалгах нь зүйтэй. 

Ихэвчлэн хүүхдүүд могойд хатгуулж байгаа учраас тэдэнд анхаарах нь чухал. 

Бага насны хүүхдүүд могойг олс гэж андуурах зэргээр таньж мэдээгүйн улмаас хатгуулж гэмтэх осол гарч байна. Иймд эцэг, эхчүүдийн зүгээс хүүхдээ гадаа тоглуулахдаа зүлэг, шуудууг сайтар шалгах нь зүйтэй" хэмээн зөвлөлөө. 

Энэ оны эхний зургаан сарын байдлаар ГССҮТ-ийн Хүлээн авах яаралтай тусламжийн тасагт нийт 81,942 хүн тусламж үйлчилгээ авсан байна.

Осол гэмтлийн тэргүүлэх шалтгааныг авч үзвэл:

• Унаж бэртэх (бүх төрлийн уналт буюу явганаас бүдрэх, ор болон шат, гуу жалга, унаа тэрэг, барилга байгууламжаас унаж бэртсэн) 40,211
• Амьгүй механик хүчин зүйлд өртөх (шил шаазан, хутга мэс болон бусад эд зүйлд өртөж гэмтсэн) 12,946
• Амьтай механик хүчинд зүйлд өртөх (нохой, муур, морь, мал, хүнд хазуулах) 7,388
• Зам тээврийн осол 7,011
• Хүчирхийлэлтэй холбоотой бэртэл гэмтэл (ахуйн хүрээний болон гэр бүлийн маргаан, зодоон цохион, архи дарс хэтрүүлэн хэрэглэснээс үүдэлтэй) 1,047 
• Түлэгдэж гэмтсэн 6,805
• Нохойд хазуулсан 1,854 гэмтэл тус тус гарчээ.