М.Энхбадрал: Иргэд өөрсдийн сонгосон төлөөлөгчөө УИХ-ын чуулганы танхимд ямар санал өгч буйг МЭДЭХ ЭРХТЭЙ

Гэрэл зургийг MPA агентлагийн онцгой зөвшөөрөлтэйгөөр ашиглав

Иргэдийг төлөөлөхөөр сонгогдсон Улсын Их Хурал(УИХ)-ын гишүүдийн ирц болон хууль батлахад өгсөн саналын мэдээллийг ил болгуулахаар "Цогц хөгжлийн үндэсний төв"-өөс "Мэдэх эрхтэй" нөлөөллийн аяныг эхлүүлжээ. 

Энэ талаар өнөөдөр Үндэсний мэдээллийн төвд хэвлэлийн хурал зохион байгуулав.

“Цогц хөгжлийн үндэсний төв” ТББ-ын Гүйцэтгэх захирал, социологич М.Энхбадрал "Иргэд сонгогчид Үндсэн хуулиар олгогдсон эрх болон мэдэх эрхийг баталгаажуулсан Нийтийн мэдээллийн ил тод байдлын тухай хуулиар өөрийн сонгосон төлөөлөгчөө УИХ-ын чуулган дээр ямар санал өгч байгааг мэдэх бүрэн эрхтэй. 

Энэхүү мэдээллийг ил болгосноор УИХ-д тавих иргэдийн хяналт, өөрийг нь төлөөлөн ажиллаж буй гишүүдийн ажлын гүйцэтгэлийг үнэлэх боломжтой болно. Өмнө нь энэ мэдээллүүдийг ил болгохоор УИХ-ын Тамгын газарт хоёр удаа гомдол, дөрвөн удаа хүсэлт өгсөн. Гэвч гаргаж өгөхгүй байсан тул Захиргааны хэргийн шүүхэд гомдол гаргасан ч хүлээж аваагүй. Иймд давж заалдан, УИХ-ын Тамгын газарт энэ мэдээллийг гаргаж өгөхийг даалгах хүсэлт тавьсан ч биелээгүй байна. 

Эдгээр үйл ажиллагааны эцэст, "Цогц хөгжлийн үндэсний төв" ТББ-аас олон нийтийн дэмжлэгтэйгээр нөлөөллийн ажил болгон "Мэдэх эрхтэй" аяныг эхлүүлээд хоёр дахь долоо хоногтоо үргэлжилж байна. Аяны хүрээнд бид УИХ-ын Тамгын газар болон УИХ-ын даргад хаягласан өргөдлийн загварыг гаргасан. Үүнд өөрсдийн нэр, хаяг, утасны дугаарыг бичиж, хүргүүлснээр өөрсдийн мэдэх эрхийг хангах нөлөөллийн аянд нэгдэж байна гэсэн үг. Энэ хугацаанд 100 гаруй өргөдлийг УИХ-ын дарга болон УИХ-ын Тамгын газарт хүргүүллээ.

Мэдэх эрхийг хангах, өөрсдийг нь төлөөлж буй төлөөлөгчийг УИХ-ын танхимд хууль батлахад ямар санал өгч байгааг иргэд мэдэх эрхтэй. Уг эрхээ баталгаажуулахын тулд хамтаараа нөлөөллийн ажил зохион байгуулж байна" гэлээ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Өчигдөр УИХ-ын Тамгын газраас аяны төлөөллийг хүлээн авч уулзан, шаардлагыг нь хүлээн авч, мэдээллийг ил болгохоор ажиллах тул аянаа өндөрлүүлэх санал тавьсан байна. Харин "Цогц хөгжлийн үндэсний төв"-өөс мэдэх эрхийг бүрэн хангасны дараа л аянаа өндөрлүүлнэ гэдгээ илэрхийлжээ. 

Мөн тус төвөөс uih.mn сайтад УИХ-ын гишүүдийн чуулганд суусан ирц, намтар, хөрөнгө орлогын мэдүүлэг зэрэг мэдээллийг оруулсан тухайгаа танилцуулав. 

Социологич М.Энхбадрал "Иргэд хянаснаар парламент, УИХ-ын гишүүдийн хариуцлага, ёс зүй дээшилнэ. Иргэдийг төлөөлөх чиг үүрэг нь үр дүнтэй хэрэгжинэ. Мэдээллийг бүрэн ил болох хүртэл та бүхэн аянд нэгдэж, өргөдлөө үргэлжлүүлэн өгөөрэй" хэмээлээ.