В.Байгал: Коронавирусийн эсрэг вакцин хүүхдүүдийг халдвар, хүндрэл, эндэгдлээс 90-95% хамгаалж байна гэсэн үр дүн гарсан
Халдварт Өвчин Судлалын Үндэсний Төвийн Дархлаажуулалтын албаны дарга В.Байгал хүүхдийн дархлаажуулалттай холбоотой мэдээлэл өглөө.
Тэрбээр "Энэ оны наймдугаар сарын 1-нээс 5-11 насны хүүхдүүдийг коронавирусийн эсрэг вакцинд хамруулах гэж байна. Олон улсын судалгаанаас тухайн насны хүүхдүүдэд коронавирусийн эсрэг вакцин хийснээр хүүхдийг шинж тэмдэг бүхий халдвар, хүндрэл, эндэгдлээс 90-95 хувь хамгаалж байна гэсэн үр дүн гарсан.
Хүүхдүүдийг нэг сарын зайтай хоёр удаа "Комирнэти" (BNT162b2) вакцинаар дархлаажуулж, халдвараас сэргийлнэ. Хүүхдэд зориулсан найрлага агууламжтай. Эцэг, эхчүүд таниулах зөвшөөрлийн хуудастай танилцаж, сайн дурын үндсэн дээр хүүхдэдээ вакцин хийлгэнэ.
Вакцины нэгдүгээр тунгийн хувьд сум, өрхийн эрүүл мэндийн нэгж дээрх дархлаажуулалтын цэгүүдээр дамжуулж хийнэ. Харин хоёрдугаар тунг сургууль, цэцэрлэг дээр түр цэг нээж, зохион байгуулна. Тухайн вакцин сайн дурын үндсэн дээр хийгдэж байгаа учраас вакцин хийлгээгүй бол сургууль, цэцэрлэгт оруулахгүй гэсэн зүйл байхгүй гэдгийг анхааруулъя" гэлээ.
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
