Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийг 7 минутад эцэслэн батлав
Монгол Улсын Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийг УИХ эцэслэн батлав.
Үндсэн хуулийн цэцээс өмнөх болон одоогийн Ерөнхийлөгч нар дахин нэр дэвших нь Үндсэн хууль зөрчсөн явдал болно хэмээн дүгнэсэн. Уг дүгнэлтийг УИХ хүлээн авснаар Ерөнхийлөгчийн сонгуулийн тухай хуульд өөрчлөлт оруулах шаардлага бий болсон.
Гэвч Ерөнхийлөгчийн сонгуулийн тухай хуулийн 81.1-д "Монгол Улсын Ерөнхийлөгчийн ээлжит сонгуулийн санал авах өдрөөс өмнөх нэг жилийн хугацаанд Монгол Улсын Ерөнхийлөгчийн сонгуулийн тухай хууль батлах, түүнд өөрчлөлт оруулахыг хориглоно" гэсэн заалттай зөрчилдсөн. Гэвч эрх баригчид хуульд өөрчлөлт оруулахаас өөр аргагүй хэмээн тайлбарласан.
Цаг сунган хуралдсан чуулганы хуралдаанд Монгол Улсын Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийг хэлэлцсэн Төрийн байгуулалтын байнгын хорооны санал дүгнэлтийг УИХ-ын гишүүн М.Оюунчимэг танилцуулав.
Түүний танилцуулснаар "Монгол Улсын Ерөнхийлөгчид нэр дэвшигч гэж Үндсэн хуулийн 30.2 дахь хэсэг, Монгол Улсын Ерөнхийлөгчийн сонгуулийн тухай хуульд заасан шаардлагыг хангаж, Ерөнхийлөгчид нэр дэвшин бүртгүүлж, нэр дэвшигчийн үнэмлэх авсан Монгол Улсын иргэнийг ойлгоно. Мөн Монгол Улсын Ерөнхийлөгчөөр өмнө нь Ерөнхийлөгчөөр сонгогдон ажиллаагүй, Монгол Улсын уугуул иргэн зөвхөн нэг удаа сонгогдоно" хэмээн хуулийн өөрчлөлтөд тусгасан байна.
Уг хуулийн төслийг байнгын хороогоор хэлэлцэх үед анхны хэлэлцүүлгийг эцэслэн батлах үе шаттай нэгтгэн явуулах горимын саналыг УИХ-ын гишүүн Д.Тогтохсүрэн гаргажээ. Түүний гаргасан горимын саналыг чуулганы хуралдаанд оролцсон гишүүдийн олонх дэмжив.
Хуулийн төслийг хэлэлцэхтэй холбогдуулан үг хэлж, санал гаргах гишүүн байсангүй. Ийнхүү Монгол Улсын Ерөнхийлөгчийн сонгуулийн тухай хуульд өөрчлөлт оруулах тухай хуулийн төслийн анхны хэлэлцүүлгийг эцэслэн батлан үе шаттай нэгтгэн явуулснаар Ерөнхийлөгчийн сонгуулийн тухай хуульд өөрчлөлт орууллаа.
Ташрамд дурдахад, энэхүү хуулийн төслийг хэлэлцэж, эцэслэн батлах үе шат долоон минут үргэлжилсэн юм.
