Өвөрхангайн "Сэмжид хужирт" сувилалд эмчлүүлээд Дархан-Уул аймагт очсон гурван иргэнээс коронавирусийн халдвар илэрчээ
Дархан-Уул аймагт коронавирусийн халдварын гурван тохиолдол батлагдсан талаар тус аймгийн Онцгой комиссоос өчигдөр мэдээллээ.
Дархан-Уул аймгийн Онцгой комиссын дарга Б.Азжаргал "Өвөрхангай аймгийн Хужирт сумын нутаг дэвсгэр дэх Сэмжид хэмээх сувиллын газарт эмчлүүлж байсан иргэдээс коронавирусийн халдвар илэрлээ гэх мэдээллийг мэргэжлийн байгууллагуудаар дамжуулан авлаа. Иймд яаралтай авах арга хэмжээний хүрээнд дээрх сувиллын газарт сүүлийн 14 хоногийн хугацаанд очоод ирсэн иргэдийн мэдээллийг татан авч, иргэдийг шинжилгээнд хамруулж байна.
Гуравдугаар 21-22-нд шилжих шөнө тус сувиллын газраас есөн том хүн, нэг хүүхэд нийт 10 иргэн ирсэн. Тэднээс коронавирусийн халдвар илрүүлэх шинжилгээ авахад гурван хүн коронавирусийн халдвартай нь батлагдлаа" хэмээв.
Сүүлийн 14 хоногт "Сэмжид хужирт" сувиллын газраас нийт 17 иргэн Дархан-Уул аймагт очсон байна. Эдгээр иргэний 14 нь Шарын гол суманд, гурав нь Дархан хотод байгаа аж.
