ХУУЧИРСАН МЭДЭЭ: 2020/12/20-НД НИЙТЛЭГДСЭН
Маргаашаас эхлэн БЗД-ийн 70-80 мянган иргэнд коронавирус илрүүлэх шинжилгээ хийнэ
iKon.MN
Гэрэл зургийг mpa.mn
Баянзүрх дүүргийн нэгдсэн эмнэлэгт коронавируст “Ковид-19” халдварын голомт үүссэнтэй холбогдуулан тус дүүрэгт 2020 оны арванхоёрдугаар сарын 21-28-ний өдрүүдэд 70,000 - 80,000 иргэнийг PCR-ын шинжилгээнд хамруулж, тандалт хийхээр Улсын онцгой комиссоос шийдвэрлэсэн.
Тус шийдвэрийн хэрэгжилтийг хангах зорилгоор Нийслэлийн онцгой комисс, Дүүргийн онцгой комисс болон Нийслэлийн Эрүүл мэндийн газар хамтран ажиллаж байна.
Шинжилгээг Баянзүрх дүүргийн ерөнхий боловсролын нийт 19 сургуулийн байранд зохион байгуулах бөгөөд шинжилгээний цэг тус бүрт төв эмнэлэг, төрөлжсөн мэргэжлийн эмнэлэг, дүүргийн эрүүл мэндийн төвийн эрүүл мэндийн ажилтан, мэргэжлийн хяналтын байцаагч, цагдаагийн албан хаагч ажиллана.
Жич: Баянзүрх дүүрэгт коронавируст “Ковид-19” халдварыг илрүүлэх өргөтгөсөн шинжилгээ зохион байгуулахтай холбогдуулан дээр дурдсан хугацаанд Баянзүрх дүүргийн цэгүүдэд бусад шинжилгээг зохион байгуулахгүй болно.
Эх сурвалж: ЭМЯ
