С.Цэцэгмаа: Хотын төвийн сургуулиудын орчимд замын хөдөлгөөн сийрэг болсон эерэг үр дүн гарч байгаа

Гэрэл зургийг mpa.mn

Нийтийн тээврийн үйлчилгээний талаар Нийслэлийн тээврийн үйлчилгээний газрын Тээврийн төлөвлөлт, технологийн хэлтсийн дарга С.Цэцэгмаагаас тодрууллаа.

-Нийтийн тээврийн үйлчилгээнд хэчнээн автобус гарч байгаа вэ?

-Өнөөдрийн байдлаар нийтийн тээврийн үйлчилгээнд 18 ААН-ийн 900 автобус явж байна. Амралтын өдөр 600 автобус үйлчилгээнд гардаг. Ойрын хугацаанд ачаалал ихтэй чиглэлүүдийн автобусны тоог нэмэхээр 20 орчим автобусыг бэлтгэж байгаа.

-Нэмж үйлчилгээнд явуулах автобуснуудыг аль аль чиглэлд явуулах вэ, Одоогоор хамгийн ачаалалтай чиглэлд хэчнээн явтобус явдаг вэ?

-Ачаалал ихтэй чиглэлүүдэд 20-25 автобус үйлчилгээнд гардаг. Одоогийн байдлаар хамгийн ачаалалтай нь Таван шар-Улаанхуаран, Зүүнсалаа-Халдварт чиглэлүүд байна. Өглөө хотын төв рүүгээ, орой зах руу чиглэсэн иргэдийн урсгалын гол ачааллыг энэ хоёр чиглэл үүрч байгаа.

Нэмэгдэх автобусуудыг Нисэх, Чингэлтэй, Зүүнсалаа, Өлзийт хороолол, Улаанчулуут, Таван шар гэх мэт чиглэлүүдэд явуулна.

-Арваннэгдүгээр сарын 15-наас сургуулийн автобус явж эхэлсэн. Хэчнээн автобус явж байгаа вэ?

-29 сургуулиас 33 чиглэлд 40 сургуулийн автобус яваад хэвшчихлээ. Давхардсан тоогоор өдөрт 5,000 хүүхэд сургуулийн автобусаар үйлчлүүлдэг. Өглөөд 1,800, өдөр 2,000, оройд 1,200 орчим хүүхэд сургуулийн автобусанд сууж байна. Хотын төвийн 1, 45, 5, 6, 31, 35 гэх мэт том сургуулиудын орчимд замын хөдөлгөөн сийрэг болсон эерэг үр дүн гарч байгаа.