"Музейн барилгыг авч үлдэх бидний тэмцэл үр дүнд хүрсэнгүй. Бид дийлдлээ"

 

Гэрэл зургийг mpa.mn

Монгол туургатан төв холбооноос “Улсын төв музейд хууль бусаар халдаж байна” сэдвээр мэдээлэл хийж байна.

ШУУД ҮЗЭХ:

2019 есдүгээр сарын 27-ны өдөр Улаанбаатарт иргэдийн форумаас хэлэлцүүлэг зохион байгуулсан. Салбар салбарын төлөөлөл оролцсон уг хэлэлцүүлгээс Байгалийн түүхийн музейг авч үлдэх асуудалд байр сууриа нэгтгэж, иргэдийн анхааралд оруулж байлаа.

 

Гэрэл зургийг mpa.mn

"Гадны мэргэжилтнүүд хуучны барилгуудыг хүчитгэн засварлах боломжтой гэсэн дүгнэлтээ гаргаад өгсөн байхад түүнийг үл хайхран ахуйн шинжтэй шалтгаан хэлээд буулгах байр суурь илэрхийлээд байна.

Байгалийн түүхийн музейг авч үлдэх зорилготой иргэд, төрийн бус байгууллагуудын зүгээс барилгыг хүчитгэн засахад шаардагдах хөрөнгийг улсын төсвөөс гадуур шийдвэрлэх боломжийг бий болгоод байсан. Бидний хоёр сар гаруйн тэмцэл үр дүнд хүрсэнгүй. Бид дийлдлээ.

Улсын төв музей буюу Байгалийн түүхийн музейн барилгыг буулгаад дуусаж байна. Урдаас нь харахад зүгээр байгаа мэт боловч ард талыг нь буулгаад дууссан байна. Нэг л өдөр нүүрэн тал нь буух байх. 2019 оны дөрөвдүгээр сард Засгийн газрын тогтоол гарч Чингис хааны музей байгуулах болсныг зарласан бөгөөд наадмын өмнө Байгалийн түүхийн музейг буулгах шийдвэр гарсан" хэмээн Улаанбаатарт иргэдийн форумын гишүүн Д.Цэрэнжав өнөөдрийн хэвлэлийн хурлын эхэнд хэлсэн юм.

 

Гэрэл зургийг mpa.mn

Улаанбаатар хотын музейн эрдэм шинжилгээний ажилтан Г.Очбаяр "Сүүлийн хоёр сарын хугацаанд Байгалийн түүхийн музейг буулгахгүй байх асуудлаар дуу хоолойгоо хүргэж, тэмцсээр байсан. Уг барилгыг 2015 онд соёлын өвд бүртгэж авч байлаа. Энэ барилга Монгол Улсын орчин цагийн хот байгуулалтыг түүхийг илтгэх барилгуудын нэг учраас соёлын өвд бүртгэн авсан. Байгалийн түүхийн музей, Улсын драмын эрдмийн театр, Төв номын сан, Дуурь бүжгийн эрдмийн театр нь Монголын орчин цагийн түүхийг харуулсан ач холбогдолтой барилгууд юм.

Хотын төвд шинээр барилга барих тоолонд оршин суугчдын тав тух алдагдаж, түгжрэл нэмэгддэг" гэдгийг хэллээ.

 

Гэрэл зургийг mpa.mn

Монгол туургатан төв холбооны удирдах зөвлөлийн гишүүн Э.Одбаяр "Биднийг дэмжиж буй хуульчид үнэ төлбөргүй ажиллаж, шүүхэд хандсан. Захиргааны хэргийн анхан шатны шүүхээс буулгахгүй байх шийдвэр гаргасан ч давж заалдах шатны шүүх анхан шатны шүүхийн шийдвэрийг хүчингүй болгосон. Уг шийдвэр гарсны маргааш л нураагаад эхэлсэн байна. Дараагийн шатны шүүх хурлын тов зарлагдаагүй байхад л яаран буулгаж байна.

Барилгын дээврийг нураах ажил эхэлснийг уржигдар мэдсэн. Ингээд тендерийн мэдээлэл дээрээс хараад буулгаж буй компанитай холбогдоод, шүүх дээр асуудал байгааг хэлтэл ажлаа зогсооно гэдгээ хэлээд уулзахаар болсон. Маргааш нь 14:00 цагт буюу товлосон цагтаа бид очоод цаг гаруй хүлээсэн ч ирээгүй. Утсаар холбогдоход шүүхийн маргаан шийдвэрлэгдтэл ажлаа зогсооно гэсэн боловч шөнийн цагаар техник оруулаад буулгах ажлыг үргэлжлүүлсэн байна. Тиймээс цаашид хардлага төрүүлж байгаа газрын асуудал дээр хяналт тавьж явна. Буулгана гэж яриад байгаа театрууд, музей, номын санг бүгдийг нь хотын төвөөс гаргахаар төлөвлөсөн байна. Тодруулбал, хоёр театрыг нэгтгээд Үндэсний урлагийн их театрт аваачихаар төлөвлөсөн бөгөөд уг театрыг ҮСАХ эсвэл ҮЦХ-нд барина гэж байгаа. Төв номын санг Америкийн ЭСЯ-ны хойно аваачих бол Байгалийн түүхийн музейг Их тэнгэрийн аманд барина гэсэн. Ингээд гоё сайхан шинэ барилгад оруулах тухай яриад хотын төвийн барилгуудыг буулгах гэж байгааг ердөө л газартай нь холбоотой гэж хардаж байна.

Бидний зүгээс зөвхөн Байгалийн түүхийн музейн барилга биш соёлын өв болсон түүхэн барилгуудыг хамгаалахаар байр сууриа илэрхийлсээр байх болно" хэмээн ярилаа.

 

Гэрэл зургийг mpa.mn

Иргэд болон төрийн бус байгууллагуудын зүгээс "Соёлын өвөө Соёлын сайдаас хамгаалъя" гэх уриалга гаргаж байгаа гээд, БСШУС-ын сайд Ё.Баатарбилэг, Ерөнхий сайд У.Хүрэлсүх нарыг шүүхэд өгөх санаачилга гаргана гэдгээ мөн хэллээ.