Сүхбаатартын талбайд болж буй МАНАН-гийн эсрэг монгол түмний жагсаалыг зохион байгуулж буй УИХ-ын гишүүн Л.Болд, Ж.Батзандан, Л.Оюун-Эрдэнэ, Х.Нямбаатар нар дөнгөж сая УИХ-ын дарга М.Энхболдтой уулзахаар өрөөнд нь орлоо. Тэд УИХ-ын даргыг ажлаа өгөх шаардлагыг М.Энхболдод гардуулах гэж байгаа юм. Түүнээс гадна "Босоо хөх Монгол" болон бусад төрийн бус байгууллага, иргэдийн төлөөлөл УИХ-ын даргатай уулзахаар орлоо.
УИХ-ын дарга шаардлагыг хүлээж авахгүй бол 300 хүн Сүхбаатарын талбай дээр гэр барин суулт хийхэд бэлэн гэдгийг энэ үеэр УИХ-ын гишүүн Л.Болд, Ж.Батзандан нар хэллээ. "Бид өмнө нь жагссаныхаа дараа УИХ-ын дарга М.Энхболдод албан шаардлагаа гардуулахаар өрөөнд орсон ч байгаагүй бөгөөд хүлээж аваагүй. Энэ бол шаардлагыг хүлээж аваагүй анхны тохиолдол" гэсэн юм.
Суултад иргэний нийгмийн байгууллагууд, аймаг, орон нутаг, сум, дүүргийн иргэд оролцохоо илэрхийлээд байгаа аж.
Дээрх гишүүд УИХ-ын даргатай уулзсаны дараа Үндэсний аюулгүй байдлын зөвлөлийн хоёр гишүүн буюу Ерөнхийлөгч, Ерөнхий сайдтай уулзах бодолтой байгааг УИХ-ын гишүүн Л.Оюун-Эрдэнэ хэллээ.