Ж.Мөнхбат: УИХ-ыг тараах гишүүдийн гарын үсгийг цуглуулж эхлэх гэж байна
УИХ-ын гишүүн Ж.Мөнхбат өнөөдөр мэдээлэл хийлээ.
Тэрбээр "Өнгөрсөн Бямба гарагийн УИХ-ын чуулган дээр Засгийн газар огцор, УИХ-ын тар гэсэн асуудлыг би хөндсөн. Миний хэвлэл мэдээлэл хариуцсан зөвлөх Т.Зөнбилэг чуулганы хуралдаан дээр миний хэлсэн үгийг зарим хэвлэл мэдээллийн байгууллагад тараасан. Энэ ажлыг хийж яваад Баасан гарагийн орой 23-24 цагийн үед гэр рүүгээ орж явахад нь араас нь хүн боож унагаасан. Гэтэл урдаас нь дахин нэг гарч ирээд төмрөөр толгой руу нь хэд хэдэн удаа цохиж хүнд гэмтэл учруулсан байсан. Энэ асуудлыг бид БГД-ийн цагдаагийн хэлтэст гомдол гаргаад, ШШҮХ-нд шинжилгээ өгсөн.
Үүнийг би албан тушаал эрх мэдлийн төлөөх ажиллагаа, надад сануулга өгсөн явдал болсон гэж харж байгаа. Хэрэв дээрмийн сэдэл байсан бол боож унагаад дээрэмдэх байсан байх. Гэтэл боож унагаад төмрөөр цохисон байна.
Намайг өөрийнхөө зөвлөхийн толгойг хагалаад, улс төр хийж байна гэж олон нийтийн сүлжээгээр дайрч байна. Би тийм ёс суртахуунтай хүн биш.
Өнөөдөр би УИХ-ын даргад хандаж УИХ-ыг тараах тогтоолын төслийг албан бланк дээрээ бичээд өөрөө гарын үсэг зурж, эхлүүлж байна.
УИХ-ыг тараахыг манай бүлгийн хэд хэдэн гишүүн дэмжихээ илэрхийлсэн. Тухайлбал, Ж.Бат-эрдэнэ, Ё.Баатарбилэг нарын гишүүд дэмжиж байгаа.
ЖДҮХС-тай холбогдсон сайд нартаа хариуцлага тооцооч гэж би Ерөнхий сайдад удаа дараа хэлж байсан. Тэр байтугай Засгийн газрын бүтцэд байдаг төрийн бусад байгууллагын албан тушаалтнууд энэ асуудалд холбогдоод байсан ч хариуцлага тооцохгүй өнөөдрийг хүрч байна. Засгийн газартайгаа хариуцлага тооцож чадахгүй УИХ-ыг чадамжгүй гэж үзэж байна" гэлээ.
