Улсын арслан Б.Орхонбаяр, уран нугараач Э.Лхагва-Очир, холимог тулаанч Б.Энх-Оргил, сагсан бөмбөгийн 3х3 үндэсний шигшээ багийн тамирчин Э.Дөлгөөн, волейболын үндэсний шигшээ багийн тамирчин Г.Хандсүрэн, жүдогийн үндэсний шигшээ багийн тамирчин А.Адъяасүрэн нарын бүрэлдэхүүнтэй баг эзэн орон БНСУ-ын туршлагатай багтай шигшээд тунаж үлдээд II байр эзэлсэн.

Эх орноо сурталчилсан залуусын амжилтыг үнэлж Монголын Үндэсний Олимпын Хороо (МҮОХ)-ны Тэргүүн дээд шагнал болох "Бөртэ Чоно"-ын Оны онцлох үйл явдлаар тодруулав.

Өнгөрсөн есдүгээр сарын 22-ноос эхэлсэн тус нэвтрүүлэг долоон анги гарсны дараа ялагчаа тодруулахад Монголоо төлөөлж оролцсон Ж.Мишээл түрүүллээ.

Дүн өвлөөр Засгийн газрыг огцруулахаар 10-аад хоног /2025.1.11-20/ жагссан ч амжилт олоогүй Эрх Чөлөөний Эвсэл намынхан зургаан сар хүрэхгүй хугацааны дараа хүүгийнх нь найз бүсгүй тансаг брэндийн цүнх, хувцасны зургаа сошиалд нийтэлснээс болж Л.Оюун-Эрдэнийг “унана” гэж зүүдлээ ч үгүй нь лавтай.

Ерөнхий сайдаас хүү, бэр хоёрынх нь тансаглалын талаар тайлбар өгөхийг шаардсан залуус Төв талбайд “Орлогоо нотол” хэмээн жагсаж эхлээд маргаашаас нь “Огцрох амархан” уриатайгаар цугларч байх үеэр МАН-ын Бага хурлаас АН-ыг хамтарсан Засгийн газраас гаргахаар шийдвэрлэв.

МАН-ын ерөнхий нарийн бичгийн дарга Я.Содбаатар гэрээгээ зөрчсөн Ардчилсан Намын хамтарсан Засгийн газраас гаргах тухай Бага хурлын шийдвэрийг танилцуулав.

Нийгмийн бухимдал, нам доторх хагарал, эрх ашгийн зөрчил бүгд нэг цэгт огтлолцсоноор нэгэн цагт бусдыг татан унагаж байж гарч ирсэн мэхэндээ Л.Оюун-Эрдэнэ өөрөө ойчив.

Төрийн тэргүүний ивээлээр Г.Занданшатар эхлээд Засгийн газрыг, оноос өмнө Монгол Ардын Намын даргын суудлыг авч, 2027 онд Ерөнхийлөгчийн сонгуульд хүч үзэхээр бэлтгэгдэж байсан гэдэг. Гэвч энэ төлөвлөгөөг УИХ-ын дарга Д.Амарбаясгалан тасалдуулан алдав.

Г.Занданшатар, Д.Амарбаясгалан нар намынхаа даргад өрсөлдөж, есдүгээр сарын 27-нд эхэлсэн МАН-ын Бага хурлаас Д.Амарбаясгаланг олонхын санал авсан гэж зарласан ч түүний өрсөлдөгч энэхүү дүнг хүлээн зөвшөөрөөгүй юм.

УИХ-ын дэд дарга Х.Булгантуяа шөнөжин чуулганы танхимын хойморт сууж гишүүдийн ирцийг бүрдүүлээд Ерөнхий сайд Г.Занданшатарыг огцруулсан ч түүнээс уучлал гуйн гар барьж буй нь.

Ерөнхий сайд Г.Занданшатарыг огцруулсны дараа мөн өдрөө УИХ-ын дарга Д.Амарбаясгаланг өөрийнх нь гаргасан хүсэлтийн дагуу албан тушаалаас нь чөлөөлөв

Чуулганы ирц бүрдэхийг өдөржин, шөнөжин хүлээж, Засгийн газраа огцруулсан явдал парламентын түүхэнд жишээ болон яригдаж, судлагдах нь гарцаагүй. Үндсэн хуулийн цэцийн Их суудлын хуралдаанаас төр эргүүлэх шахсан УИХ-ын дэд дарга Х.Булгантуяаг болон Ерөнхий сайд Г.Занданшатарыг огцруулсан тухай УИХ-ын 95 дугаар тогтоол Үндсэн хууль зөрчсөн хэмээн дүгнэснээр Ерөнхий сайдын тал ялалт байгуулав.

Энэхүү уналт 2025 онд эергээр төсөөлсөн төсвийн 31 их наяд төгрөгийн орлогыг 3.3 их наяд төгрөгөөр тасрахад хүргэсэн. Ингэснээр Л.Оюун-Эрдэнийн 14 мега төслийг, хүүхдүүдийнх нь тансаглалыг, 2050 онд Азийн хүлэг улс болох дэврүүн хүслийг Ганцмод боомт дахь овоолготой нүүрс гацаав.

2024 онд 3,400 төгрөгийг дундчилж байсан ам.долларын ханш 2025 оны долоодугаар сард 3,580 төгрөгт хүрч, 100 жилийн ойгоо тэмдэглэж буй монгол төгрөгийн ханш цэвэр 100 төгрөгөөр унасан хүндхэн жил боллоо. 

Үнийн өсөлт, дарга нарын албан тушаалын төлөөх бужигнаан дунд багш, эмч нар цалингаа, ахмадууд тэтгэврээ нэмүүлэхээр жагсаж, 2026 оны төсөв дээр багагүй дарамт учруулсан. Гэвч энэ оны үлдэж буй хугацаанд төсвийн орлого 2.3 их наяд төгрөгөөр тасарч болзошгүй байгаа талаар Сангийн сайд мэдээлсэн.

Сагсан бөмбөгийн 3х3 төрлийн ес дэх удаагийн Дэлхийн Аварга Шалгаруулах Тэмцээн (ДАШТ) Улаанбаатар хотод өнгөрсөн зургаадугаар сард амжилттай зохион байгуулагдсан. Манай шигшээ баг БНХАУ, АНУ, Польшийн багийг хожиж, улмаар түүхэндээ анх удаа мөнгөн медаль хүртсэн юм.

Энэ оны зургаадугаар сард Арабын Нэгдсэн Эмират Улсын Дубай хотод сагсан бөмбөгийн Азийн Аваргуудын лигийн тэмцээн болж, Хасын Хүлэгүүд баг хүрэл медаль хүртсэн. Энэ нь манай лигийн баг түүхэндээ анх удаа Азийн томоохон лигт амжилт үзүүлсэн явдал билээ.

"The MongolZ" баг энэ жил Counter Strike-2 тоглоомын дэлхийн аварга шалгаруулах тэмцээний дэд байрт шалгарсан бол цахим спортын олимп гэгддэг Esports World Cup 2025 тэмцээний аваргаар тодорсон.

Арванхоёрдугаар сард зохион байгуулагдсан PUBG MOBILE тоглоомын Дэлхийн Аварга Шалгаруулах Тэмцээний Grand final шатанд манай улсын "Alpha Gaming" баг оролцон гуравдугаарт байр эзэллээ.

Холимог тулааны Азийн хамгийн том мэргэжлийн холбоо гэх тодотголтой "One Championship"-ын аваргын бүсний эзнээр Баатархүүгийн Энх-Оргил тодорсон юм. Тэрбээр жингийнхээ аварга Бразилын Фабрико Андрадег дөрөвдүгээр үед боож ялснаар тус холбооны аваргын бүс авсан хоёр дахь монгол тулаанч болсон түүхтэй.

Монгол Улсын Гавьяат тамирчин Эрдэнэбатын Цэндбаатар 12 дараалан ялалт байгуулж, WBA холбооны Төв Азийн аваргын бүсийг энэ оны хоёрдугаар сард авлаа. Дэлхийн мэргэжлийн боксын дөрвөн том холбооны WBA нь Монголд анх удаа мэргэжлийн боксын Төв Азийн аваргын бүсийн төлөөх тулааныг зохион байгуулсан нь онцлох үйл явдал байсан юм.

Эхний ээлжинд эрүүл мэндийн салбарынхны цалинг 2026 он гармагц 30 хувиар нэмэхээр болсон. Тэгвэл энэ мөнгө хаанаас гарах вэ гэдэг асуултад "Ирэх онд Эрүүл Мэндийн Даатгалын Сангаас хэмнэсэн мөнгөөрөө эмч ажилчдын цалинг нэмнэ" гэх төсөөллийн хариулт Засгийг газраас өгөөд буй. 

Багш нарын тухайд ирэх оны эхээр 2,226,000 төгрөгийн цалин авахаар болов. Мөн адил тэдний цалинг үе шаттай нэмэх амлалтыг Боловсролын Яамнаас өгөөд буй. Тэгвэл энэ бүх нэмэгдэл хөрсөн дээрээ хэрхэн бууж, улсын эдийн засагт ямар тусгал үзүүлэхийг ирэх жилээс бид харах нь ээ. 

Тэтгэврийн зээлийн хугацааг 36 сар болгон нэмэгдүүлэх шийдвэрийг Монголбанкнаас гаргахдаа эргэн төлөлтийн дарамтыг бууруулна хэмээн тайлбарласан. Гэвч ахмадууд зээлсэн тэтгэврийнхээ маш бага хэсгийг өөрөө хэрэглэж, үлдсэн тэтгэврээрээ сарын хэрэгцээгээ хангадаг гэдгийг арилжааны банкны төлөөллүүд хэлсээр буй. 

Монгол болон Бүгд Найрамдах Туркменистан Улс 1992 онд дипломат харилцаа тогтоосон. Үүнээс хойш 33 жилийн түүхэнд тус улсын төрийн тэргүүний хувиар ноён Сердар Бердымухамедов анх удаа Монгол Улсад айлчиллаа. Айлчлалын хүрээнд Монгол, Туркменистаны харилцаа, хамтын ажиллагааг хөгжүүлэх 14 баримт бичигт гарын үсэг зурав.

Бүгд Найрамдах Узбекистан Улсын Ерөнхийлөгч Шавкат Мирзиёев гэргийн хамт Монгол Улсад төрийн айлчлал хийж, уул уурхай, хөдөө аж ахуй зэрэг олон салбарт харилцаа хамтын ажиллагааг гүнзгийрүүлэхээр санамж бичиг, гэрээ хэлэлцээрийг байгуулсан байна.

Мөн Холбооны Бүгд Найрамдах Австри Улс Монгол Улс дипломат харилцаа тогтоосноос хойш 62 жилийн дараа тус улсын Ерөнхийлөгч Александр Ван дер Беллен гэргийн хамт Монгол Улсад айлчилсан.

Сүүлийн жилүүдэд боловсролын салбарт хамтын ажиллагаа өргөжсөөр буй Австралийн Холбооны Улсын Амбан захирагч Саманта Мостин нөхрийн хамт манай улсад айлчлав. Энэхүү айлчлал нь 31 жилийн дараа Австралийн Холбооны Улсын Амбан захирагчийн түвшинд Монгол Улсад ирж буй айлчлал юм.

Монгол Улсын хамгийн том хандивлагч орны нэг, боловсрол, эрүүл мэнд, технологи гээд салбар бүрд өргөн хүрээнд хамтран ажилладгийн хувьд Наран улсын хаан, хатныг монголчууд үндэстний хувцсаараа гоёж, төв талбайдаа халуун дотноор угтан авсан.

Онгоцноосоо буумагцаа мөнгөн аяганаас ааруул амсаж буй дүрс япончуудын анхаарлыг татаж, ааруулыг ихэд сонирхоцгоож, айлчлалын баг бүрэлдэхүүнд ирсэн хэвлэлийнхэн мэдээ сурвалжилгууд бэлдэж байв

Тодруулбал оны эхээр буюу нэгдүгээр сарын 17-ны өдөр Монголчууд Франц улстай байгаль дээрх ураны хүдрийг олборлон боловсруулах “Зөөвч-Овоо” төсөлд хамтран ажиллах тухай хөрөнгө оруулалтын гэрээг үзэглэв.  Уг төслийн эхлэл анх 1997 онд тавигдсан ч өдийг хүртэл 28 жил гацсан юм.

Монголд анхны гуравдагч хөршийн том хөрөнгө оруулалт хийгдсэнээс хойш 16 жилийн дараа хийгдэж буй хоёр дахь томоохон хөрөнгө оруулалт болох уг төсөл нь Монгол орны зүүн өмнөд хэсэг Дорноговь аймгийн Улаанбадрах сумын Аргалант багийн нутагт хэрэгжих юм. 

💵 Нийт төслийн хугацаанд  $5 тэрбумын  ашигтай ажиллаж, 👷 1,600 орчим ажлын байр шинээр бий болох юм. 

Төрийн ордны гаднаа "No Uran" гэж орилолдон төмпөн шанага хангиналдаж байсан ч алга нижгэнүүлэн гэрээгээ үзэглэв. 

Томоохон төслүүд хөдөлж эхлэх буухиаг үргэлжлүүлж энэ оны тавдугаар сарын 14-ны өдөр 16 жил гацсан Гашуунсухайт-Ганц мод боомтын төмөр замын гэрээг хийж бүтээн байгуулалтыг эхлүүлэв. Гашуунсухайт-Ганцмод боомтын хил дамнасан төмөр зам нь Замын-Үүд-Эрээн боомтуудыг төмөр замаар холбосноос хойш 75 жилийн дараа баригдах гэж буй хоёр дахь төмөр зам гэдгээрээ онцлог юм. 

Хотын удирдлагууд иргэдээс хураасан татварын мөнгийг олон зүйлд зарцуулсны нэг нь ХАГАС КОКС түлш юм. Улаанбаатар хотыг утаанаас нь салгахын тулд БНХАУ-аас хагас кокс буюу хөх нүүрсээр хийсэн шахмал түлшийг 226 тэрбум төгрөгөөр худалдан авч, айл өрхүүдэд хөнгөлөлттэй үнээр тарааж эхэлсэн.

Хүйтний эрч чангарах үеэр гэр хорооллын айл өрхүүд хагас кокс түлшний хомсдолд орж эхэлсэн. Улмаар 5,000 төгрөгөөр зарагдаж эхэлсэн хагас кокс түлш 10,000-15,000 төгрөгөөр дамлан зарагдаж байсан юм.

Улаанбаатар хотод зам талбай, шугам хоолойн засварын ажил гурван улирал дамнан өрнөж, энд тэндгүй ухсан шугам хоолойн нүх, хуулж хаясан явган хүний зам талбай, хөдөлгөөн хаасан авто замын засварын ажлууд нийслэлийн иргэдийг бухимдуулсан.

Гэвч түүнээс хойш сар гаруй өнөөх "шок" нь үргэлжилсээр, эцэст нь шинэхэн дэд сайд нь шатахууны нийлүүлэлт хангалттай хэмжээнд хүрэхгүй байгаа хэмээснээр үнэнээ хүлээв.

Жил жилийн намар өвлийн заагт монголчууд шатахууны хомсдолд орсоор үүндээ дассан ч энэ жилийнх хавьгүй урт хугацаанд үргэлжлэв. Албаныхны зүгээс хүйтний улиралтай зэрэг эхэлсэн шатахууны хомсдолын буруутнаар өнгөрсөн зун аймаг, сумын 100 жилийн ой тэмдэглэж, бензинээ хэтрүүлэн хэрэглэсэн иргэдийг нэрлэсэн юм.

Шатахууны нөөц бүрдүүлэх боломжгүй байгаа нь энэ мэт хүндрэлийн өмнө улсаар нь сөхрүүлж байгааг дөнгөж сая л анзаарсан Засгийн газар Монголбанкаар дамжуулан шатахуун импортлогчдод нөөцийн сав барих зээл олгохоор шийдвэрлэсэн. Гэвч үүнийг шийдэл гэхээс илүү энэ салбарын монопол компаниудын лобби гэх шүүмжлэл давамгайлж буй. 3-6 сарын шатахууны нөөц хадгалдаг савтай болоход 1.5 тэрбум орчим ам.долларын эх үүсвэр хэрэгтэйг салбарын сайд өмнө нь мэдээлж байв.

Стратегийн бүтээгдэхүүний нийлүүлэлтээр нэг улсаас хэт хараат байхын горыг айл болгон амсаж, дотооддоо газрын тос боловсруулах үйлдвэртэй болох мөрөөдлөө дор бүрнээ ярьсаар дахин нэг оныг ийнхүү үдэж байна.

Энэ оны долоодугаар сард Засгийн Газраас, мансуурах донтой иргэдийг эмчлэх, сэтгэл зүйн тусламж үйлчилгээ үзүүлэх, нийгэмшүүлэх чиг үүрэгтэй төвийг ЭМЯ-ны харьяа байгуулах асуудлыг судлах, Монгол Улсад хориглосон хязгаарласан, хяналтад байх шаардлагатай мансууруулах эм, сэтгэцэд нөлөөт эмийн жагсаалтыг шинэчлэн батлах.

Мөн УИХ 2002 онд баталсан Мансууруулах эм, сэтгэцэд нөлөөт бодисын эргэлтэд хяналт тавих хуулийн шинэчилсэн найруулгын төслийг шуурхай боловсруулах зэргийг холбогдох байгууллагуудад үүрэг болгосон ч одоогоор явцын талаар мэдээлэл байхгүй байна.