Б.Найдалаа: Утааг бууруулж чадаагүй алдаагаа хүлээн зөвшөөрч байж гарц, шийдлээ олно

Улсын Их Хурлын Байгаль орчин, хүнс, хөдөө аж ахуйн байнгын хорооноос “Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсголыг  зохион байгуулж байна.

Хоёр өдөр үргэлжилж буй уг сонсголд Улсын Их Хурлын гишүүдээс гадна нийт 104 оролцогч бүртгүүлснээс төрийн байгууллагаас 64, төрийн бус байгууллага, иргэдийн төлөөлөл 46, мөн хэвлэл  мэдээллийн байгууллагууд оролцож байгаа аж.

Энэ үеэр УИХ-ын гишүүн Б.Найдалаа агаарын бохирдлыг бууруулж чадаагүй алдаагаа салбарын яамд, холбогдох байгууллагууд хүлээн зөвшөөрч байж, гарц шийдлээ амархан олох, улмаар асуудлыг хариуцлагажуулж эзэнжүүлэх нь чухал гэлээ.

Тэрбээр “Одоо бүгдээрээ бодит байдалтайгаа нүүр тулаад хариуцлагын асуудал ярихгүй бол 2040 онд ч утаа гээд хэрэлдээд л суусаар байх болно. Иймд эхлээд бүгдээрээ яг хэн, хаана, яаж алдсанаа тогтоогоод асуудал хариуцсан яамд, дарга, нийслэл, институцүүд нь хүлээн зөвшөөрөх хэрэгтэй байна. Утаанаас үүдэлтэй яг хэдэн хүн нас барсан нь хүртэл зөрүүтэй, яам нь хоёр өөр тоо гаргаад сууж болохгүй.

Цаашид хэн яг юун хариуцахаа тов тодорхой болгох хэрэгтэй. Утаагаа, шахмал түлшээ, стандартаа бүгдийг яг хариуцах эзэнтэй байлгая. Шийдлээ богино, дунд, урт хугацаагаар ангилан боловсруулж, шаардлагатай бол УИХ-аар батлуулах хэрэгтэй” гэхчлэн байр сууриа илэрхийллээ.