Г.Тэмүүжин: Шүүхийн шийдвэрт Ж.Хатанбаатар ахлагчтай багт уламжлалт эмнэлгийг зарах мөнгөн дүнг тогтоогоогүй

Сонгинохайрхан дүүргийн Нэгдүгээр хороололд байрлах "Уламжлалт анагаах ухааны элэг судлалын клиник төв"-ийг НЗД-ын 2000 оны 12 дугаар сарын 29-ний өдрийн захирамжаар "Нийслэлийн Засаг даргын дэргэдэх Уламжлалт анагаах ухааны элэг судлалын клиник төв" болгожээ. Уг төвийн асуудлаар албаны хүн өнөөдөр мэдээлэл өглөө.

Нийслэлийн Өмчийн Харилцааны Газрын Өмчийн хяналт шалгалтын хэлтсийн дарга Г.Тэмүүжин "Уламжлалт анагаах ухааны Элэг судлалын клиник төвийг Нийслэлийн Засаг даргын 2000 оны арванхоёрдугаар сарын 29-ний 468 дугаар захирамжаар "НЗД-ын дэргэдэх Уламжлалт анагаах ухааны элэг судлалын клиник төв" гэж өөрчилсөн байдаг.

2008 оны есдүгээр сарын 8-ны өдөр Уламжлалт анагаах ухааны Элэг судлалын клиник төв нь нийслэлтэй менежментийн гэрээ байгуулсан. Менежментийн гэрээг Ж.Хатанбаатар ахлагчтай багтай гурван жилийн хугацаатай байгуулж ажиллаж байна. Одоо гэрээний хугацаа дууссан. 2011-2014 онуудад аудитын комисс байгуулж, менежментийн гэрээг дүгнэсэн байдаг. Нийслэлийн Өмч Хувьчлалын Комиссын/НӨХК/ 2012 оны нэгдүгээр сарын 17-ны тогтоолоор тус менежментийн гэрээг хангалттай гэж дүгнэсэн бол 2014 оны гуравдугаар сарын 5-ны тогтоолоор гэрээний биелэлт хангалтгүй гэж дүгнэж, хаахаар шийдвэрлэсэн.

Менежментийн баг нь тухайн байгууллагын санхүүгийн зардал болон бүх үүрэг, хариуцлагыг хүлээж, үйл ажиллагааг сайжруулах чиглэлээр ажилладаг.

2008 оны зургаадугаар сарын 30-ны өдрийн байдлаар Уламжлалт анагаах ухааны элэг судлалын клиник төвийн балансад аж ахуйн барилга хоёр, гарааш хоёр, нийтийн эзэмшлийн хөрөнгө нэг, сувилал, эмчилгээний төв хоёр, бидний нэрлэж заншсанаар Нэгдүгээр хорооллын Хархоринд байрлах эмнэлгийн төв барилга, Сүхбаатар дүүргийн 6 дугаар хорооны нутаг дэвсгэрт байрладаг эмийн үйлдвэрийн барилга нийт 9 объектыг өгсөн. Анх менежментийн гэрээ байгуулах үед 9 объектын балансын нийт үнийг 808 сая 722 мянга 703 төгрөгөөр бүртгэсэн байна.

Уламжлалт анагаах ухааны элэг судлалын клиник төвд хүлээлгэн өгсөн барилга байгууламжуудын шинэчилсэн үнэлгээг мэргэжлийн байгууллагуудаар гаргуулна. 2008 онд хүлээлгэн өгсөн балансын үнийн дүнд их хэмжээний өөрчлөлт орно.

Ж.Хатанбаатар ахлагчтай Уламжлалт анагаах ухааны элэг судлалын клиник төвд холбогдох гурван шатны шүүхийн шийдвэр нь менежментийн багийн үйл ажиллагааг хэвээр явуулах, өмч хувьчлах комиссын процессыг үргэлжлүүлэх байсан. Шүүхийн шийдвэрт Ж.Хатанбаатар ахлагчтай багт яг тэдэн төгрөгөөр зар гэдэг мөнгөн дүнг тогтоогоогүй.

Нийслэлийн зүгээс Уламжлалт анагаах ухааны элэг судлалын клиник төвийн хөрөнгийг шинээр дахин үнэлүүлэх, өнөөдрийн бодит зах зээлийн ханштай нийлүүлэх нь зүйтэй гэж үзэж байгаа юм" гэв.