Гэрэл зургийг MPA агентлагийн онцгой зөвшөөрөлтэйгөөр ашиглав

“Гашуунсухайт-Ганцмод" боомтын хил дамнасан төмөр замын гүүрийг БНХАУ-тай хамтран барих Монгол талын ажлын хэсгийг ахалж буй Аж үйлдвэр, эрдэс баялгийн яамны сайд Ц.Туваан өнөөдөр төслийн явцын талаар мэдээлэл өглөө.  

Хоёр талын ажлын хэсгүүд одоогоор 60 орчим удаа хуралдаад байгаа аж. 

Төсөл анх 2003 оноос яригдаж, 2009 онд хоёр орны Засгийн газрын уулзалтаар хил дамнасан төмөр замын бүтээн байгуулалтыг эхлүүлэх хэлэлцээрээ байгуулан үүнээс хойш олон жил гацсан гэдгийг тэрбээр онцлов. 

Өнөөдөр хоёр улсын хэлэлцээрийг ямар асуудлуудын хүрээнд байгуулах талаар чиглэлийг Улсын их хурлаас авч байгаа бөгөөд тогтоол батлагдсаны дараа гэрээ, хэлэлцээрүүд дараах үе шаттай явах юм байна. 

1. Хоёр улсын Засгийн газар хоорондын гэрээ байгуулагдаж, УИХ-аар соёрхон батлагдана.
2. Хоёр компани хооронд гуравласан гэрээ буюу төмөр замын холболт, нүүрс худалдан авалт, уурхайн хүчин чадлыг нэмэгдүүлэх гэрээнүүдийг хийнэ. 

"Онч-Хараат, Бортолгойн лицензтэй талбай дээр нээлттэй тендер зарлана"

Аж үйлдвэр, эрдэс баялгийн яамны сайд Ц.Туваан "Энэ хэлэлцээрийг бид цаг алдалгүй, маш хурдан хугацаанд байгуулж ажилд нь оруулахгүй бол өдөр хоног их алдаж байгаа. Алдсан боломж болон алдах боломж маш их байгаа. Монгол Улс нэг хүнд ногдох дотоодын нийт бүтээгдэхүүнээ 10 мянган ам.доллароос давуулах зорилгод энэ төсөл том түлхэц болох юм. 

Мөн өмнө нь Хятадын тал Эрдэнэс Тавантолгой компанийн эзэмшиж байгаа лицензийн тодорхой ордуудад хувь эзэмшиж өөрсдөө давуу эрхтэйгээр олборлолт хийе гэж ярьж байсан. Одоогийн ажлын хэсгийн хуралдаанууд дээр Хятадын тал энэ саналаасаа бүрэн татгалзсан. 

Тавантолгойн орд жилдээ 30 гаруй сая тонн нүүрсийг олборлож байгаа. Нүүрс худалдан авах урт хугацааны гэрээ байгуулагдсан тохиолдолд энэ уурхайн хүчин чадал дийлэхгүй. Иймд Тавантолгой компанийн зүгээс нээлттэй тендерийг Онч-Хараат, Бортолгой гэсэн өмнө нь хайгуул нь хийгдчихсэн лицензтэй талбай дээрээ зарлана. Энд оролцох эрх нь бүх компаниудад нээлттэй байх юм" гэв.