Нийслэлийн хэмжээнд коронавирус илрүүлэх PCR шинжилгээнд хамрагдах иргэд өнөөдрөөс эхлэн eruul.gerege.mn цахим хуудсаар дамжуулан цаг олгож эхэлсэн билээ.

Гэсэн хэдий ч тус сайтад нэвтэрч цаг авсан олон иргэнийг тогтоогдсон байршлын дагуу очиход шинжилгээ авахгүй, буцааж байгаа гомдол манай редакцад ирсэн юм.

Тодруулбал, Баянгол дүүргийн иргэд eruul.gerege.mn сайтаар дамжуулж цаг аваад, доор дурдсан байршил болон цагийн хуваарийн дагуу Мөнх-Үжин өрхийн эрүүл мэндийн төв дээр очжээ. 

Гэсэн ч тус эмнэлэг дээр коронавирусийн шинжилгээ авахгүй байсан тул БГД-т байрлах бусад цэг болох 13 дугаар сургууль дээр очиход "Манайд цаг аваагүй тул шинжилгээ авахгүй" гэсэн хариу өгсөн байна.

 

Тиймээс бид уг асуудлаар албаны хүмүүсээс тодрууллаа.

Эхлээд "Гэрэгэ Системс" ХХК-аас тодруулахад "Бид Эрүүл мэндийн яамнаас өгсөн чиглэлийн дагуу коронавируст халдварын шинжилгээ авах цэгүүдэд сул байгаа цагийг иргэдэд олгож байгаа" гэсэн хариу өгсөн юм. 

"Шинжилгээний цэгүүд сургууль дээр байрлаж байгаа тул ӨЭМТ-д цаг олгогдох ёсгүй"

Энэ тухай НЭМГ-ын албаны хүн хэлэхдээ "Нийслэлийн хэмжээнд ажиллаж буй коронавируст халдвар илрүүлэх PCR шинжилгээний 30 цэг нь ихэнх нь сургууль дээр байрлалтай тул Өрхийн эрүүл мэндийн төв коронавирус илрүүлэх шинжилгээ авах боломжгүй.

Тэр дундаа нийслэлийн төвийн зургаан дүүрэгт коронавирусийн шинжилгээний цэг бүгд сургуулиуд дээр байрлаж буй.

Тиймээс ямар нэг байдлаар өрхийн эрүүл мэндийн төвд цаг олгогдох ёсгүй. Үүнийг тодруулъя" гэсэн тайлбар өглөө.

Нийслэлийн хэмжээнд коронавирус илрүүлэх шинжилгээ авч буй 30 цэгийн байршил

БАЯНГОЛ ДҮҮРЭГ:

• 13-р сургууль
• 20-р сургууль
• 47-р сургууль
• 114-р цэцэрлэг.

БАЯНЗҮРХ ДҮҮРЭГ:

• 21-р сургууль
• 48-р сургууль
• 69-р сургууль
• 133-р сургууль
• 142-р сургууль.

СОНГИНОХАЙРХАН ДҮҮРЭГ:

• 9-р сургууль
• 12-р сургууль
• 36-р сургууль
• 62-р сургууль
• 67-р сургууль
• 83-р сургууль.

СҮХБААТАР ДҮҮРЭГ:

• 3-р сургууль
• 31-р сургууль
• 58-р сургууль.

 ХАН-УУЛ ДҮҮРЭГ:

• 7-р сургууль
• 18-р сургууль
• 34-р сургууль
• 52-р сургууль.

ЧИНГЭЛТЭЙ ДҮҮРЭГ:

• 39-р сургууль
• 50-р сургууль
• 72-р сургууль.

БАГАНУУР ДҮҮРЭГ:

• Халдвартын тасаг
• Нийгмийн эрүүл мэндийн төв.

 НАЛАЙХ ДҮҮРЭГ:

• Амбулаторийн хуучин байр.

БАГАХАНГАЙ ДҮҮРЭГ:

• Эрүүл мэндийн төв.