ЭМЯ: Хонг Конгийн 20:00 цагийн онгоцоор ирж буй өндөр халуунтай иргэнийг тусгаарлана
Хонг Конгийн онгоцоор өндөр халуунтай ирж буй нэг иргэнийг тусгаарлах талаар Эрүүл мэндийн яамнаас мэдээллээ.
Тодруулбал, Хонг Конгоос өнөөдөр 20:00 цагт Чингис хаан олон улсын нисэх буудалд буух онгоцонд зорчиж байгаа өндөр халуунтай монгол иргэнийг ХӨСҮТ-ийн тандалтын багийнхан тусгаарлах арга хэмжээг авах аж.
Өнөөдөр 11:00 цагийн байдлаар Дэлхийн эрүүл мэндийн байгууллагын өгсөн мэдээллээр шинэ коронавирусаар өвчилсөн тохиолдол 2,796, нас барсан хүний тоо 80 болжээ.
БНХАУ-д 2,761 тохиолдол, үлдсэн 35 тохиолдол нь бусад улсад бүртгэгдсэн ба бүх нас баралт зөвхөн БНХАУ-д гарсан аж.
БНХАУ-ын Эрүүл мэндийн яамны өгсөн мэдээгээр:
461 хүн сэхээн амьдруулах тасагт эмчлэгдэж байна. Бүрэн эдгэрсэн 49 иргэн эмнэлгээс гарсан. Өвөрмонголд 7, Манжуурт 2, Шилийн голд 1, Эрээнд 4 сэжигтэй тохиолдол бүртгэгдгэгджээ.
Харин манай улсад одоогоор шинэ коронавирусийн халдвар бүртгэгдээгүй байгаа юм.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
