Голомт банкны нөөцийн удирдлагын газрын шинжээчид өнгөрсөн 7 хоногт гадаадын валютын, алтны, хөрөнгийн зах зээл дээр гарсан ханшийн хөдөлгөөний учир шалтгаан болоод энэ 7 хоногт ханшийн хөдөлгөөнд дэвшүүлж буй таамаглалыг танилцуулж байна.

1. Валютын зах зээл

Гадаад валютын зах зээл дараах 3 гол үйл явдлыг дагаж ханш хөдөлж байна. Үүнд:

• АНУ - Хятадын худалдааны хориг, дайн;
• Их Британи Европын холбооноос гарах (BREXIT) эсэх асуудал;
• Европын холбооны сонгууль

Техник шинжилгээ:

• Евро (EURUSD) -гийн ханшийн сулрал 1.10 хүртэл үргэлжлэх магадлалтай. 5.23, 24, 25-ны өдрүүдэд Европын холбооны сонгуулийн өдрүүд тохиож байгаа.
• Иенийн ханш (USDJPY) долоо хоногийн эхний өдрүүдэд бага зэрэг өсөлт үзүүлсний дараа суларч хаагдах магадлалтай.
• Юанийн ханш (USDCNH) -ийн сулрал ёроолын цэгтээ хүрэхэд ойрхон ирсэн байна. Хятадын засгийн газар ханшийг 7.0 гэдэг түвшнээс дээш гаргахгүй байх бодлого барьдаг.
• Долларын индекс (DXY) -ийн ханш энэ 7 хоногт өсөлттэйгөөр арилжаалагдах магадлал илүү өндөр байна гэж харж байна.
• Фунт стерлинг (GBPUSD) Өнгөрсөн 7 хоногт ам.долларын эсрэг хүчтэй суларсан үзэгдэл боллоо. Гэхдээ уналт энэ 7 хоногт дахин үргэлжлэхгүй, эргээд ханш сэргэнэ гэж үзэж байна.

Жич: Та арилжааны болон ханш дээр суурилсан бусад шийдвэр гаргалт хийх гэж байгаа бол нэмэлт эх сурвалжуудаас мэдээлэл цуглуулж хувьдаа дүгнэлт хийсний үндсэн дээр шийдвэрээ гаргана уу.

2. Алтны зах зээл

Хятадын тал АНУ-ын эсрэг шийдвэр (АНУ-гаас худалдан авч байгаа $60 тэрбумын бүтээгдэхүүн дээр 25% -ийн татвар) гаргасантай холбоотойгоор өнгөрсөн 7 хоногийн даваа гарагт алтны ханш огцом өсж ~ 1300 ам.долларт хүрч мягмар, лхагва, пүрэв гарагуудад түүнтэй ойролцоо түвшинд хэлбэлзэж байлаа.

Харин үүний дараа АНУ-ын үл хөдлөх хөрөнгийн зах зээлийн тоон үзүүлэлтүүд зарлагдсан (хүлээлтээс сайн үр дүн гарсан буюу салбар өсч байгаа мэдээ гарсан) -тай холбоотойгоор ам.доллар чангарч алт унах нөхцлийг бүрдүүлсэн байна. Улмаар баасан гарагт ханш 1276 хүртэл унаж хаагдлаа.

Энэ 7 хоногт алтны ханш унах магадлал өндөр байна гэж үзэж байна.

3. Хөрөнгийн зах зээл

Хонг Конгийн хөрөнгийн биржийн индекс (HSI) 5.10-нд ~28,600 орчимд хаагдсан бол 5.13-нд зах огцом уналт (gap)-тайгаар нээгдсэн. Улмаар 7 хоногийн эцэст ханш унаж хаагдлаа. Өнөөдөр зах мөн л уналттай байлаа. Харин Dow Jones индексийн хувьд мөн огцом уналт (gap)-тайгаар нээгдэж 7 хоногийн сүүлийн өдрүүдэд өсөж хаагдлаа.

Өөрөөр хэлбэл 2 улсын худалдааны дайн Хятадын эдийн засагт илүү сөргөөр нөлөөлж байна.

Америкийн хөрөнгийн зах зээл 2009 оноос хойш ~10 жил өсөлттэй (bull market) байгаа нь түүхэн дэх хамгийн урт удаан үргэлжилж байгаа өсөлт юм байна. Дунджаар АНУ-ын хөрөнгийн зах зээлийн өсөлттэй үе 8.5 жил үргэлжилдэг байна.

Bull market  цаашид үргэлжлэх эсэх нь 2 улсын худалдааны дайны процессоос ихээхэн хамаарах болов уу...