11 дүгээр сарын 1-нээс гадаад паспортыг том хүнд 10, хүүхдэд 5 жилийн хугацаатайгаар олгож эхэлнэ
Улсын бүртгэлийн багц хууль шинэчлэгдэн найруулагдсантай холбоотойгоор арваннэгдүгээр сарын 1-нээс эхлэн энгийн гадаад паспортыг 10 жилээр олгодог болно.
1999 онд батлагдсан өмнөх хуулиар гадаад паспортыг нэг болон таван жилийн хугацаатай олгож байсан юм.
Харин ирэх сарын 1-нээс эхлэн гадаад паспортыг 16-аас дээш насны иргэнд 10 жилээр, 16-аас доош насны хүүхдэд 5 жилийн хугацаатай олгохоор болжээ. Ингэхдээ хуучин гадаад паспорт захиалахад мөрдөгдөж байсан төлбөр хураамжийн үнэ өөрчлөгдөхгүй.
Тодруулбал, гадаад паспортыг 10 жилийн хугацаагаар захиалахад 32,800 төгрөгийн төлбөртэй /ажлын 10 хоногт гарна/
Яаралтай бол 10 мянган төгрөгийн нэмэгдэл авч ажлын гурван өдөрт багтаан гаргаж өгөх юм.
ГАДААД ПАСПОРТ ШИНЭЭР АВАХАД
- Иргэний цахим үнэмлэх
- Сүүлийн 6 сарын дотор авхуулсан 3,5х4,5 хэмжээтэй 3 хувь цээж зураг
- Төлбөр төлсөн баримт
- Хэрэв гоо сайхны мэс засал хийлгэсэн бол эмчийн магадалгаа
ХҮҮХДЭД ГАДААД ПАСПОРТ АВАХАД
- Төрсний гэрчилгээ эх хувиар хуулбарын хамт
- Эцэг, эх буюу асран хамгаалагчийн иргэний үнэмлэх
- 5-аас дээш насны хүүхэд өөрийн биеэр заавал эцэг, эх буюу асран хамгаалагч, харгалзан дэмжигчийн хамт ирэх
- Сүүлийн 6 сарын дотор авахуулсан 3.5х4.5 хэмжээтэй 3 хувь цээж зураг
- Төлбөрийн хувьд том хүний гадаад паспорт авахтай ижил.
Арваннэгдүгээр сарын 1-нээс өмнө захиалсан хугацаа нь дуусаагүй гадаад паспортууд хүчинтэй байх бөгөөд хүсвэл шинээр захиалж болно гэж Улсын бүртгэлийн Ерөнхий газрын дарга Б.Баасандорж онцоллоо. Мөн цаашид 2019 оноос гадаад паспорт нь чиптэй цахим ухаалаг хувилбарт шилжих юм. Энэхүү ухаалаг паспорт нь 48,64 хуудасны сонголттой байх аж.
