Жолооч нарт батламж гардуулж, ажлын томилолтыг нь олгож эхэллээ

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, “Монгол Тээвэр Нэгдэл” ХХК-тай байгуулсан Санамж бичгийн хүрээнд хүнд даацын автомашины жолоочийн ажлын байранд бүртгүүлэн, хувь хүний хөгжлийн цогц сургалтад бүрэн хамрагдсан залуучуудад батламж гардуулж, ажлын томилолтыг олгож эхэллээ.

 

Нийслэлийн Залуучуудын хөгжлийн газрын дарга С.Сүх-Очир “Жолоочийн 80 ажлын байранд 194 иргэд бүртгүүлснээс энэ сарын 24-27-ны өдрүүдэд зохион байгуулсан хувь хүний хөгжлийн цогц сургалтад ирц бүрэн, идэвхтэй оролцож, хариуцлагатай хандсан залуучуудад батламж гардуулж, ажлын байранд нь шууд холбож өглөө. Энэ удаагийн ажилд орсон залуучуудын хариуцлагатай байдал, ажлын гүйцэтгэлээс хамааран цаашид тус үйл ажиллагаа үргэлжилнэ” гэж хэллээ.

Өнөөдөр батламж гардан авсан залуучууд  “Монгол Тээвэр Нэгдэл” ХХК-д гишүүнчлэлтэй 17 компанид хуваагдан ажиллах юм байна. 

“Монгол Тээвэр Нэгдэл” ХХК нь БНХАУ-ын “Чалко” компанитай өнгөрсөн нэгдүгээр сараас 2022 он хүртэл хамтын ажиллагааны тогтвортой байдлын гэрээ байгуулан ажиллаж байгаа юм. Тус нэгдлийн ажилчдын байр Гашуун сухайт боомтын 25-35 дахь километр хооронд байрлах ба байр, хоолны зардлыг ажил олгогч байгууллага бүрэн хариуцаж, нээлттэй ажлын байранд шинээр орох залуучуудын нэг сарын үндсэн цалин 1.5-2 сая төгрөг. Түүнчлэн жолоочийн идэвх, зүтгэлээс хамааран цалингийн хэмжээ нэмэгдэх боломжтой.

 

Батламжаа гардан авсан залуучуудын төлөөлөл Д.Хүдэрчулуун “Энэ дөрвөн өдрийн сургалтууд үр дүнтэй боллоо. Батламж гардан авч, шууд ажилдаа орох болсондоо баяртай байна. Мөн ангилал дутуу, мэргэшиж амжаагүй байгаа жолооч нарыг нэгдсэн сургалтад хамруулан, бичиг баримт нь бүрэн болсны дараа шууд ажилд нь оруулахаар болсонд талархаж байна” хэмээлээ.

Эх сурвалж: Нийслэлийн Залуучуудын хөгжлийн газар