Ч.Хүрэлбаатар: ОУВС-ийн уулзалтаар цалин, тэтгэвэр нэмэх талаар ярилцана
ОУВС-гийн Өргөтгөсөн санхүүжилтийн хөтөлбөрийн хүрээнд энэ Лхагва гарагт ээлжит уулзалт болох товтой байгаа аж. Энэ үеэр цалин, тэтгэвэр нэмэх асуудлаар ярилцахаар төлөвлөж байгаагаа Сангийн сайд Ч.Хүрэлбаатар өнөөдөр болсон Засгийн газар, Азийн хөгжлийн банкны гэрээнд гарын үсэг зурах ёслолын үеэр сэтгүүлчдэд мэдээлсэн юм.
Засгийн газар 2018 он гарнаас хойш өнөөдрийг хүртэл 4 орчим их наяд төгрөгийн өр төлөөд буй. Зургаадугаар сард л гэхэд 753.3 тэрбум төгрөгийн өр төлснөөр 2018 онд төлөх нийт өрийнхөө 70 орчим хувийг барагдуулаад байгаа аж.
Монгол Улсын эдийн засгийн өсөлт 6.1 хувьтай байгаа. Валютын нөөц нэмэгдэж, гурван тэрбум ам.долларт хүрсэн. Улсын төсвийн тэнцэл 2018 оны эхний хагас жилд ашигтай гарсан. Манай улсын зээлжих зэрэглэлийг нэг шатлалаар нэмсэн байгаа.
Сангийн сайд Ч.Хүрэлбаатар энэ бүхнийг дурдаад эдийн засаг сайжирч, эерэг үзүүлэлттэй байгааг онцлоод “ОУВС-тай хамтын ажиллагаагаа өргөжүүлэх байр суурьтай байгаа. Энэ хүрээнд бид цалин, тэтгэврийн талаар ярилцаж, ойлголцолд хүрнэ гэсэн зарчимтай байна” хэмээн хэллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
