Франц улсын нэн хөнгөлөлттэй зээлээр баригдах дүүжин тээврийн эд ангиуд болох эхний ачаа Улаанбаатарт буув

Гэрэл зургийг Mpa.mn

Улаанбаатар хотод Франц улсын нэн хөнгөлөлттэй зээлээр баригдах гэж буй дүүжин замын тээврийн эд ангиуд болох эхний ачаа өнөөдөр буусан байна.

Эх сурвалжийн мэдээлснээр дүүжин тээврийн 19 тулгуур баганын суурийн анкор боолт болон тэдгээрийг холбосон суурь шайб зэрэг 18.9 тонн ачаа иржээ. Францаас дүүжин тээвэрт зориулсан 20 орчим багана, кабел, хоёр зогсоол барих бараа материалыг оруулж ирэх юм байна.

“Улаанбаатар кабель кар” төслийг хэрэгжүүлж, гүйцэтгэгчээр  Франц улсын “Пома” групп ажиллаж буй. 

Яармагийн Арцатын амнаас Сонгинохайрхан дүүргийн Өнөр хороолол хүртэл 4.2 км урт замыг 11 минутад туулах 98 кабинтай, нэг бүхээгт 10 зорчигч тээвэрлэх дүүжин замын тээврийн барилга угсралтын ажлыг эхлүүлэх юм.

Дүүжин тээврийн замын эхлэл, төгсгөл хэсэг дэх зогсоолууд болон 19 тулгуур баганыг угсрах юм байна. Эдгээр багана нь иржээ.

Төслийг жилийн 0.0078%-ийн хүүтэй, нэн хөнгөлөлттэй, 40-өөс дээш жилийн хугацаатай зээлээр хэрэгжүүлнэ.

"Улаанбаатар хотод Туул гол дээгүүр дүүжин тээврийн шугам тавигдах бөгөөд дүүжин тээврийн бүхээгийн суудал халдаг байх шийдэлтэй. Агаарын нийтийн тээврээр зорчиход өөр мэдрэмж төрж, өндрөөс 360 градус хотыг харна. Дүүжин тээвэр 2025 оны арванхоёрдугаар сард иргэдэд үйлчилнэ" гэж "Пома" компанийн төслийн менежер Чарли Коддериц мэдээлж байсан юм.

Дэлхийн хамгийн урт 10 дүүжин тээвэр:

1. Merida Cable Car /Венесуэл улс 12.5 км/
2. Hon Thom Cable Car /Вьетнам улс 7.9 км/
3. Tianmen Shan , /Хятад улс 7.4 км/
4. Fanispan Cable Car /Вьетнам улс 6.3 км/
5. Chicamocha Cable Car /Колумб улс 6.3 км/
6. Ba Na Hills /Вьетнам улс 5.8 км/
7. Wings of Tatev /Армян улс 5.75 км/
8. Ngong Ping 360 /Хонг Конг 5.7 км/
9. Dragondola /Япон улс 5.5 км/
10. Mi Telefrico /Болив улс 4.7 км/