Францын "Пома" групп Улаанбаатарт хэрэгжих дүүжин тээврийн кабиныг үйлдвэрлэж эхэлсэн байна

Гэрэл зургийг Mpa.mn

Улаанбаатар хотын нийтийн тээврийн төрөл, хүртээмжийг нэмэгдүүлэх, оргил цагуудад хамгийн ихээр бий болдог Яармагийн чиглэлийн түгжрэлийг бууруулах зорилгоор дүүжин тээвэр буюу “Улаанбаатар кабель кар” төслийг хэрэгжүүлж, гүйцэтгэгчээр  Франц улсын “Пома” групп ажиллаж буй. 

Яармагийн Арцатын амнаас Сонгинохайрхан дүүргийн Өнөр хороолол хүртэл 4.2 км урт замыг 11 минутад туулах 98 кабин бүхий дүүжин замын тээврийн барилга угсралтын ажлыг эхлүүлэхээр бэлтгэл хангаж буйг албаныхан мэдээллээ.

Тодруулбал эхлэл төгсөл хэсэг дэх зогсоолууд болон 19 тулгуур баганын барилга угсралтын ажлыг эхлүүлэх хүрээнд газар ашиглагч байгууллагуудтай зөвшилцөн шийдвэрлэжээ.

Харин нарийвчилсан зураг дизайныг Барилгын Хөгжлийн Төвийн дэргэдэх мэргэжлийн зөвлөлийн хурлаар хэлэлцүүлж, төслийн гүйцэтгэгч "Пома" групп кабины үйлдвэрлэлийг эхлүүлсэн байна.

Уг төсөл хэрэгжсэнээр оргил цагийн үед нэг чиглэлд нэг цагт 30 орчим  автобус дүүрэн зорчигчтой тэнцэх хэмжээний зорчигч тээвэрлэж, Улаанбаатар хотын Баянгол дүүргийн 29 дүгээр хороо, Сонгинохайрхан дүүргийн 16 дугаар хороо, Хан-Уул дүүргийн 4, 23 дугаар хорооны оршин суугчид үр нөлөөг нь хүртэх аж. Тиймээс “Улаанбаатар кабель кар” төслийг эрчимжүүлэх шаардлагатайг Хотын дарга Франц Улсын Сенат дахь Монгол-Францын найрамдлын бүлгийн дарга Филипп Мүеэтэй уг төслийн талаар санал солилцох үеэрээ мэдэгджээ.

 

Францын талаас дүүжин тээврийн төслийн бүтээн байгуулалтад бүхий л талаар дэмжлэг үзүүлэхээ илэрхийлсэн байна.

Төслийг жилийн 0.0078%-ийн хүүтэй, нэн хөнгөлөлттэй, 40-өөс дээш жилийн хугацаатай зээлээр хэрэгжүүлэх юм.

Дүүжин тээврийн төслийг гацсан гэх яриа гарч байсан ч албаныхан үгүйсгэв.