Т.Мөнхдалай: Метроны тендерт шалгарсан "Dohwa Engineering" компани нь төрийн өмчит биш

Гэрэл зургийг MPA агентлагийн онцгой зөвшөөрөлтэйгөөр ашиглав

Египет улсын Каир хотын метроны үндсэн шугамыг барьж байгуулах ажилд хяналтын инженерээр ажиллаж байсан Т.Мөнхдалай Улаанбаатарт метро байгуулах төслийн нэгжид ажиллахаар иржээ.

Тэрбээр метроны зөвлөх үйлчилгээний тендерт шалгарсан БНСУ-ын "Dohwa Engineering" компанийн талаар мэдээлэл өглөө.

Инженер Т.Мөнхдалай "Тендерт шалгарсан БНСУ-ын "Dohwa Engineering" компани миний өмнө ажиллаж байсан компанитай хамтарч ажиллаж байсан.

"Dohwa Engineering" компани нь төрийн өмчит биш, Хөрөнгийн биржид бүртгэлтэй бөгөөд санхүүгийн мэдээлэл нь нээлттэй. Интернэтээр хайхаар мэдээлэл нь гарна.

Тус компани нь таван компанитай нэгдэж тендерт оролцсон. Эдгээр хамтарч буй компаниуд дотор төрийн өмчит компани бий. Гэхдээ "Dohwa Engineering" компани гол үйл ажиллагаагаа манлайлах юм.

Миний хувьд дөрвөн улсын метроны зөвлөх үйлчилгээний төслийн менежментийн багт ажиллаж байв" гэж ярилаа.

Метроны зөвлөх үйлчилгээнд тухайн үеийн ханшаар силвер багцыг сонгож, 50 сая ам.доллартой тэнцэх хэмжээний мөнгийг 2024 оны төсөвт тусгажээ. Энэ мөнгийг метроны дизайн, геологийн суурь судалгаануудыг хийхэд зарцуулна гэдгийг хотын дарга хэлэв.

Түүний тайлбарласнаар Баруун дөрвөн замаас 10 дугаар хороолол хүртэл хэсэг болон эцсийн өртөө, зогсоол хүртэл зайд геологийн судалгаа хийх юм байна. Геологийн судалгаа хийгдсэний дараа метроны бүтээц буюу барилга барих, зургийг гаргах компанийн тендерийг зарлах аж.

• БНСУ-ын “Dohwa Engineering” компани нь Филиппин, Алжир, Панам улсад төмөр замын төсөл хэрэгжүүлсэн туршлагатай. Бүх төрлийн инженерингийн төслийг дотооддоо болон олон улсад хэрэгжүүлдэг байна.
• “Korea National Railway” компани төмөр замын дэд бүтцийн бүтээн байгуулалт, засвар арчилгаа, менежментийг хийдэг бөгөөд өндөр хурдны галт тэрэгний гурван төсөл хэрэгжүүлжээ. Азийн 15 улс, Европын гурван улс, Африк , Өмнөд Америкт төмөр замтай холбоотой төсөл хэрэгжүүлжээ.
• “Korea Railroad Corp” компани нь Манила хотын метроны долоодугаар шугамд барилгын явцын зөвлөх үйлчилгээ болон оперэйшны зөвлөх үйлчилгээ үзүүлж байгаа. БНСУ-д их багтаамжийн нийтийн тээврийн томоохон 15 төсөл амжилттай хэрэгжүүлжээ.
• “Soosung Engineering” компани нь метро, төмөр зам болон бусад дэд бүтцийн төслүүдэд ТЭЗҮ, суурь судалгаа, дизайн хийдэг бөгөөд БНСУ-д 500 гаруй судалгаа хийсэн байна. Мөн Ази, Өмнөд Америк, Африк тивд сүүлийн 20 орчим үйл ажиллагаа явуулж байгаа.