Метроны зөвлөх үйлчилгээний тендерт БНСУ-ын "Dohwa Engineering" компани шалгарчээ

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хот метротой болоход зөвлөх үйлчилгээ үзүүлэх II шатны сонгон шалгаруулалтад Орос, Хятад, Өмнөд Солонгос, Энэтхэгийн компани бичиг баримтаа ирүүлсэн тухай мэдээлж байв.

Эдгээр дөрвөн компаниас БНСУ-ын "Dohwa Engineering" Co, Ltd шалгарсан болохыг хотын дарга Х.Нямбаатар өнөөдөр/2024.06.11/ зарлалаа. Тендерийн үнэлгээний хороо тус компанийг сонгожээ. Ингэснээр метроны зөвлөх үйлчилгээг БНСУ-ын "Dohwa Engineering" компани үзүүлэхээр болж байна. Тус компани нь “Korea national railway”, “Korea railroad corporation” “Soosung Engineering” компаниудтай түншлэл болж тендерт оролцжээ. 

Метроны бүтээн байгуулалтын ажлыг 2025 онд эхэлнэ гэж тэрбээр мэдэгдэв.

Уг шийдвэрийг "Dohwa Engineering" компанид хүргүүлснээс хойш тав хоногийн дотор бусад оролцогчдоос ямар нэгэн маргаан гарахгүй бол тав хоногийн дараа гэрээний үндсэн хэлэлцээр эхэлж, геологийн судалгаа хийх, EPC тендерийн баримт бичгийг боловсруулах юм байна. Ингэсний дараа метроны гүйцэтгэгч компанийг сонгон шалгаруулна гэв.

"Dohwa Engineering" Co, Ltd 145 тэрбум 911 сая төгрөгийн үнийн санал ирүүлээд байсан юм.

Тус компани Ази, Африк, Латин Америкийн орнуудад метроны төсөл хэрэгжүүлсэн томоохон компани бөгөөд дөрвөн компанитай түншлэл болж, тендерт оролцжээ.

Тендерийн I шатанд 20 компани оролцсон билээ.