Эваристе Коуасси-Комлан: Зудтай байгаа сумдын хүүхдүүдэд дулаан хувцас шаардлагатай байна
Нэгдсэн Үндэстний Байгууллага(НҮБ)-ын Хүүхдийн сангийнхан зудтай байгаа Увс, Ховд аймгийн Давст, Түргэн, Үенч, Булган, Алтай суманд ажиллаад иржээ.
Эдгээр таван суманд л гэхэд 2,200 гаруй хүүхэд Даваа гарагт сургуульдаа очих боломжгүй болоод байгааг НҮБ-ын Хүүхдийн сангийн Суурин төлөөлөгч Эваристе Коуасси-Комлан хэлэв.
Тэрбээр "Онцгой байдлын байгууллагаас зудын эрсдэлийн үнэлгээг тогтмол хийдэг. Бид нэгдүгээр сарын эхний долоо хоногийн үнэлгээнд суурилж, таван сумыг сонгон ажиллаад ирлээ.
Ингэхэд оторт явсан хүмүүс нийгмийн тусламж үйлчилгээ авах боломжгүй болсон, зам харгуй хаагдсан, малын тэжээл болон бензин тосны хэрэгцээ шаардлага их байгаа нь харагдсан.
Бидний очсон зорилго нь зудын нөхцөл байдалд бүхий л хүчээ дайчлан ажиллаж буй хүмүүст урам зориг өгөхөөс гадна өөрсдийн цуглуулж, бэлдсэн хандив тусламжаа хүргэх юм. Тодруулбал, сургалтын материал, эм, хүүхдийн амин дэм гээд 100,000 гаруй эд зүйлийн хандив өглөө.
Малчин өрхүүдэд шаардлагатай зүйлс их байна. Ялангуяа хүүхдийн дулаан хувцас, зам гаргах, эрүүл мэндийн тусламж хүргэх, өвс тэжээлийн хандив өгөх зэрэг юм. Иймд байгууллага, аж ахуйн нэгж, хувь хүмүүсийг хандив өргөхийг хүсэж байна. Шаардлагатай тусламжийг цаг алдалгүй хүргэснээр учирч болох эрсдэлийг бууруулах боломжтой.
Даваа гарагт ерөнхий боловсролын сургуулийн хичээл эхэлнэ. Гэтэл нэр дурдсан таван суманд л гэхэд 2,200 гаруй хүүхэд сургуульдаа очих боломжгүй болсон байна. Иймд зам гаргаж тэдгээр хүүхдийг сургууль, цэцэрлэгтээ очих боломжийг нээх хэрэгтэй.
Зуд нь мал аж ахуйгаас гадна хүүхдүүдэд маш их нөлөөлдөг. Тиймээс хүүхдүүд анхаарлаас гадуур үлдэж болохгүй" гэлээ.
Түүнчлэн төрийн байгууллагууд, онцгой байдлын албаныхан, орон нутгийнхан хичээн ажиллаж байгаа ч үүссэн нөхцөл байдлын сөрөг нөлөөг бууруулахад хараахан хүрэхгүй байгаа тул хамтрагч байгууллагууд үйл ажиллагаагаа эрчимжүүлэх шаардлагатайг тэрбээр онцолсон юм.
Хандив өгөхийг хүссэн хувь хүн, байгууллагууд НҮБ-ын Хүүхдийн санд хандах боломжтой.
