Д.Баярболд: Өнөөдрийн байдлаар улсын хэмжээнд 144,997 иргэн эрт илрүүлэгт хамрагдсан

Гэрэл зургийг MPA агентлагийн онцгой зөвшөөрөлтэйгөөр ашиглав

Эрүүл мэндийн яам(ЭМЯ)-наас урьдчилан сэргийлэх, эрт илрүүлгийн талаар мэдээлэл хийлээ. Монгол Улсын Засгийн газрын шийдвэрээр 2022 оны тавдугаар сараас эрт илрүүлэг, үзлэг, оношилгооны ажил эхэлсэн. Улсын хэмжээнд өчигдрийн байдлаар нийт 144,997 хүн эрт илрүүлэгт хамрагдсан гэдгийг ЭМЯ-ны Нийгмийн эрүүл мэндийн газрын дарга Д.Баярболд хэллээ. 

Тэрбээр "Сарын хугацаанд 144,997 хүн хамрагдсан нь иргэдийн идэвх сайн байгааг харуулж байна. Үзлэгт хамрагдсан иргэдийн 46.3 хувь нь эрэгтэйчүүд,  53.7 хувь нь эмэгтэйчүүд байна. Статистикийн үнэлгээнээс харахад эрэгтэйчүүдийн эрт илрүүлэгт хамрагдах байдал өнгөрсөн жилүүдийнхээс нэмэгдсэн. Насны бүлгээр 0-5 насны хүүхдүүд нийт илрүүлгийн 15.1 хувь, 6-17 насны хүүхдүүд 61.8 хувьтай хамрагдаж байгаа" гэв. 

Мөн "Хүүхдүүдэд шинжилгээ хийхгүй байна гэх гомдол, санал 11-11 төвд ирж байна. Хүүхэд бол харьцангуй эрүүл бүлэгт хамрагддаг онцлогтой.  Хүүхдийн эрт илрүүлгийн багцад 

• Эмнэл зүй
• Сүрьеэ
• Сэтгэцийн эрүүл мэнд
• Амны хөндийн үзлэгүүд багтаж байгаа. Өөрөөр хэлбэл, эмнэл зүйн үзлэг гэдэг нь бүх эрхтэн системийн тогтолцоог үнэлж, эмчийн үзлэг хийнэ гэсэн үг.

Гэхдээ сүрьеэгийн үзлэгийн үед арьс цоолж сорил тавьдаг, рентген зураг авдаг. Энэ нь хүүхдийн эрүүл мэндэд эрсдэл үүсгэх учраас эмчийн үзлэгээр оношилгоо хийж, өвчний шинж тэмдэг илрэх, сэжигтэй тохиолдолд эрт илрүүлгээс дараагийн шатлал руу шилжүүлэх зохицуулалт хийж байгаа" хэмээн ярилаа.