"Халдвар гарсан зургаан аймаг болон Улаанбаатар хотод ЗГ-ын нөөц хөрөнгөөс 3 тэрбум төгрөгийн дэмжлэг олгоно"

Гэрэл зургийг mpa.mn

Засгийн газрын ээлжит хуралдаан өнөөдөр боллоо. Хуралдаанаас гарсан шийдвэрүүдийг танилцуулж байна.

ШУУД ҮЗЭХ: /2020.12.02/

УОК-ын дарга, Шадар сайд Я.Содбаатар "Зургаан аймаг, Улаанбаатар хотод Засгийн газрын нөөц хөрөнгөөс 3 тэрбум төгрөгийн дэмжлэг олгохоор шийдвэрлэлээ. Цар тахалтай холбоотойгоор төлөвлөөгүй зардал ихээхэн гарсан тул ийнхүү санхүүгийн дэмжлэг үзүүлэх юм. Тусгаарлах байрны зардал, ариутгал, халдваргүйжүүлэлт зэрэгт зайлшгүй шаардлагатай гурван тэрбум гаруй төгрөгийг Засгийн газрын нөөц сангаас гаргахаар болсон. Халдвар гарсан зургаан аймаг, Улаанбаатар хотын удирдлагуудын ирүүлсэн хүсэлтийг Сангийн яам хянасан.  Эм, эмнэлгийн хэрэгсэл, тоног төхөөрөмж зэрэгт шаардагдах хөрөнгийг төсвийн ерөнхийлөн захирагч нар батлагдсан төсвийнхөө хүрээнд шийдвэрлэж эхэлжээ. Улсын хэмжээнд 72 байршилд 2,301 хүнийг тусгаарлаад байна. 

Засгийн газраас 23 төрлийн арга хэмжээг хэрэгжүүлж байгаа. Үүнтэй холбоотойгоор зарим хуулийн төсөлд өөрчлөлт оруулах шаардлага гарч байна. Цар тахлын үед гэр хорооллын иргэдэд дэмжлэг үзүүлэх зорилгоор 220 гаруй мянган өрхөд сайжруулсан түлшийг 50 хувиар хөнгөлөлттэй үнээр худалдаална. Уг хөнгөлөлт маргаашаас эхлэн дөрөвдүгээр сарын 1-н хүртэл үргэлжилнэ. Нэг тонныг 75,000 төгрөгөөр худалдана.

Коронавирусийн халдвар дотоодод тархсанд хяналт тавин ажиллаж байна. Энэ хүрээнд халдвар тархаж болзошгүй найман цэгт хяналтын баг очиж ажиллана. Нэгдүгээрт ХӨСҮТ-д ажиллана. Хоёрдугаарт тусгаарлах байранд хяналт тавина.

Гуравдугаарт Сүхбаатар, Алтанбулаг боомт, Цагааннуур, Эрээнцав боомтод ажиллана. Зайлшгүй шалтгаануудын улмаас боомтуудыг хааж болохгүй. Нефть бүтээгдэхүүн тээвэрлэн оруулж ирдэг боомтуудыг хаавал шатахуун литр тутамд дунджаар 150 төгрөгөөр нэмэгдэх эрсдэлтэй. Боомтуудад ажиллах ажлын хэсгүүд замдаа гарсан байгаа. Мөн Замын-Үүд боомтод дотоодын халдвар гарсан тул тэнд ажлын хэсэг ажиллаж байгаа. 

Эрүүл бүсээр зарлаж буй Өмнөговь аймагт онцгой анхаарч байгаа. Түүнчлэн Орхон аймаг зэрэг найман цэг тусгайлсан чиг үүрэг бүхий ажлын хэсэг ажиллах юм" гэв.