ТАНИЛЦ: Эдийн засгийг дэмжих Засгийн газрын долоон шийдвэр ингэж хэрэгжинэ
COVID-19 өвчний халдвартай холбоотой өндөржүүлсэн бэлэн байдлын зэрэгт шилжсэн энэ үед Засгийн газраас эдийн засгийг дэмжих чиглэлээр долоон арга хэмжээ хэрэгжүүлэх шийдвэр гаргасан. Тэдгээр долоон шийдвэр хэрхэн хэрэгжих талаар Сангийн сайд Ч.Хүрэлбаатар тайлбарласныг багцлан хүргэж байна.
НЭГ. 2020 оны дөрөвдүгээр сарын 1-нээс аравдугаар сарын 1-н хүртэл зургаан сарын хугацаанд аж ахуйн нэгж, компаниудыг НДШ-ээс чөлөөлөх
- НДШ-ийг авахгүй ч дэвтэр дээр төрийн өмнөөс бичээд явна.
ХОЁР. 2020 оны дөрөвдүгээр сарын 1-нээс аравдугаар сарын 1-н хүртэл зургаан сарын хугацаанд ажилтан, албан хаагчдын цалин, хөлсөндт ХХОАТ ногдуулахгүй байх
- Энэхүү хоёр шийдвэрт дараах гурван төрлийн ажилтнууд хамаарахгүй. Үүнд,
а. Төсвөөс цалин авдаг албан хаагчид хамаарахгүй. Орлогын хэмжээнд нь өөрчлөлт орохгүй учраас
б. Төрийн өмчит аж ахуйн нэгж, орон нутгийн өмчит аж ахуйн нэгж болон төрийн өмчийн оролцоотой ААН-д хамаарахгүй
в. Гурав дахь нь тендерээр ажил гүйцэтгэж байгаа ажилтнуудад хамаарахгүй гэв.
- Үлдсэн бүх ААН, ХХОАТ бүрэн хэмжээнд чөлөөлөгдөх бөгөөд нийт 526 мянган хүн хамрагдана.
ГУРАВ. 2020 оны дөрөвдүгээр сарын 1-нээс аравдугаар сарын 1-н хүртэл зургаан сарын хугацаанд албан татвар ногдох орлогын дүн нь өмнөх татварын жилд 1.5 тэрбум төгрөгөөс бага албан татвар төлөгчдийг ААН-ийн ОАТ-аас чөлөөлөх
- Ашигт малтмал, цацраг идэвхт ашигт малтмалын хайгуул хийх, олборлох, ашиглах, тээвэрлэх, борлуулах, согтууруулах ундаа, тамхины ургамал тарих, тамхи үйлдвэрлэх, импортлох, газрын тосны бүтээгдэхүүнийг үйлдвэрлэх, бүх төрлийн шатахууныг импортлох, бөөний болон жижиглэнгийн худалдаа эрхлэх, газрын тос хайх, олборлох, борлуулах үйл ажиллагаа хамаарахгүй
- Мөн түрээсийн талбөрийн хэмжээг бууруулсан ААН-үүдийн түрээсийн орлогод ногдуулах татварыг чөлөөлнө. Тухайлбал, төвлөрсөн зах, худалдааны төвүүд, үйлдвэр үйлчилгээний газрууд, хувийн сургууль, цэцэрлэг, хүүхэд харах үйлчилгээний зориулалтын байр, талбай хамаарна.
- 500 ААН-д 108 тэрбум төгрөгийн зээл гаргах боломжтой бөгөөд зээлийн батлан даалтын санд энэ чиглэлээр ажиллах үүргийг өгсөн байна.
ДӨРӨВ. COVID-19 халдварын тархалт, халдварын эрсдлээс сэргийлж, хорио цээрийн дэглэм хэрэгжүүлсэнтэй холбогдуулан үйл ажиллагаа нь доголдож, орлого нь буурч байгаа боловч ажлын байраа хадгалсан хувийн хэвшлийн аж ахуйн нэгжүүдийн ажилтан бүрт гурван сарын хугацаанд сар бүр 200,000 төгрөгийн бэлэн мөнгөний дэмжлэг олгох
- Төрийн байгууллагын шийдвэрээр үйл ажиллаагааг нь зогсоосон ч ажлын байраа хадгалж байгаа байгууллагуудад энэ шийдвэр хамаарна
ТАВ. Ноолуур бэлтгэлийн цаг болсонтой холбогдуулан, малчдын амьжиргааг дэмжих зорилгоор ноолуур худалдан авагч, бэлтгэгчдэд гурван хувийн хүүтэй нэн хөнгөлөлттэй зээл олгох
- 3%-ийн хүүтэй 300 тэрбум төгрөгийн зээлийг Хөгжлийн банкнаас гаргаж, хүүгийн зөрүүг улсын төсвөөс гаргана.
- Хөдөө аж ахуйг дэмжих сан дээр үлдэгдэл хэлбэрээр байгаа тоног төхөөрөмжүүдийг 50% хөнгөлөөд 1,500 ААН-д 34 тэрбум төгрөгийн хөнгөлөлтийн дүнтэйгээр олгоно.
ЗУРГАА. Хүүхдийн мөнгийг гурван сарын хугацаанд 10,000 төгрөгөөр нэмэгдүүлж олгох
- 0-18 хүртэлх насны хүүхдэд мөнгөн дэмжлэг олгоно. Үүнд шаардлагатай 34.2 тэрбум төгрөгийн тодорхой хувийг сургууль, цэцэрлэгийн үйл ажиллагааг зогсоосонтой холбоотойгоор хэмнэсэн зардлаас гаргана.
ДОЛОО. 2020 оны дөрөвдүгээр сарын 15-наас бензин, шатахууныг литр тутамд 300, түүнээс дээш төгрөгөөр бууруулна
