Улаанбаатарын утаа, тортгоор унадаг дугуйн зам тавина
Улаанбаатарын агаарын бохирдлыг бууруулах янз бүрийн арга зам, шийдлийг хувь хүмүүс, байгууллага болон төр засгийн зүгээс эрэлхийлсээр байгаа.
Тэгвэл эдгээр шинэ шийдэл, санаачилгын нэг болох цахилгаан станцаас гарч буй шатаасан нүүрсний тортог болон утааг ашиглан Улаанбаатар хотын ойролцоо 50 километр унадаг дугуйн зам барих төсөл хэрэгжиж эхэлжээ. Төслийг танилцуулах арга хэмжээ өнөөдөр болсон юм.
Тус санаачилгыг Япон улсад амьдардаг, Өвөр Монгол Мүнэёши Дугаржа хэмээх залуу санаачилж эхлүүлж байгаа аж. Түүний төслийг "Dotexe Mongolia" төсөл болон Япон улсын "Rebirth Technology" компани санхүүжүүлэн, хамтран хэрэгжүүлэхэд бэлэн болсон байна.
Энэхүү төслийг Япон, Монгол хоёр улсын иргэд хамтран хэрэгжүүлж буй гэдгээрээ онцлогтой.
Улаанбаатарын агаарын бохирдлын талаарх мэдээ мэдээллийг байнга авч, сэтгэл зовнин, эмзэглэдэг М.Дугаржа хотын агаар, орчны бохирдлыг бууруулахаас гадна байгаль орчинд ээлтэй шийдэл хайж, түүний олсон санаа өнөөдөр ажил хэрэг болж байна.
Тэрбээр "Миний бие Япон улсад сүүлийн 15 жилийн хугацаанд ажиллаж, амьдарч байна. Япон улсын Тохокүгийн Их сургуулийн багш, профессор Динил Пушпалал утаа, тортгоор дугуйн зам барих эрх болон оюуны өмчийг авсан байдаг.
Динил профессортой хамтран ажиллаж, зөвлөлдсөний үр дүнд энэхүү төслийг Улаанбаатарт хэрэгжүүлэхээр болсон. Энэхүү дугуйн замыг тавьснаар байгаль орчинд ээлтэй, дахин боловсруулагдсан бүтээгдэхүүнийг гаргаж байгаа.
Эдгээрээс гадна гадны улсаас ирж буй жуулчдыг татах, тэдгээр улсуудын уулын дугуйгаар хичээллэгчдийг урьж Монголд аялал зохион байгуулах зэрэг ажлыг цаашид хийхээр төлөвлөөд байна" хэмээлээ.
Шинэ технологийн тусламжтайгаар тавигдах тус дугуйн замыг эхний ээлжид Цонжин Болдог, Хүй Долоон худаг болон Майдар хот гэсэн гурван хувилбарт байршлын аль нэгэнд нь тавихаар төлөвлөөд байгаа аж.
