ИНФОГРАФИК: "20 мянга, 2 тэрбум төгрөг асар их ялгаатай гэж хардаг сэтгэлгээн дээр ЗАЛИЛАГЧИД нааддаг"

Байраа барьцаанд тавьж, ээж эхнэр хоёрынхоо дансыг шавхаж, эгчээсээ давхар мөнгө зээлээд хамаг байдгаа шилжүүлчихсэн. Одоо яах вэ?...

Түүний хохирлын мөнгөн дүн нийт 203 сая төгрөг. Тэрбээр цахим залилангийн хохирогч бөгөөд Телеграмм орчинд даалгавар биелүүлж явсаар бүх мөнгөө алджээ. 

Яг ийм жишгээр залилан мэхлэх гэмт хэргийн хохирогч болж АМЬ АМЬДРАЛАА дэнчин тавьсан хүмүүс өдөрт 20-30-аараа цагдаад гомдол гаргадаг байна.

Хүүхдийнхээ хадгаламжийн мөнгийг барьцаалж хохирсон, байр сууцаа тавьж алдсан, бараа үйлчилгээ захиалахдаа мөнгөө түрүүлж өгөөд хохирсон гэх мэтчилэн хэргийн бүртгэл мэдээлэл янз бүр.

Өндөр цалинтай ажлын зар, бараа захиалга, хусдаг сугалаа, Телеграммаар даалгавар биелүүлэх, түрээс, хандив, мөнгө өсгөх гэхчлэн залилангийн арга хэлбэр ч өөр хоорондоо адилгүй ээ. 

Цагдаа: "Хамгийн багадаа 5-10 саяар хохирлын хэмжээ яригддаг. Хамгийн ихдээ 203 саяар хохирсон иргэн байсан"

"Монголчууд ямар гэнэн юм бэ, яасан баян юм бэ?... Магадгүй дээрх дүнг уншаад Танд ийм бодол төрж мэднэ. 

(Зураг дээр дарж томруулж харна уу)

Тэгвэл залилан мэхлэх гэмт хэргийн хохирогчид яагаад бага дүнгээр биш, ийм их хэмжээний мөнгөөр хохирдгийг цагдаа ийнхүү тайлбарлаж байлаа.

Харамсалтай нь жилээс жилд та бидний халаасыг тэмтэрч хулгай хийх нь багасаж, харин эсрэгээрээ цахим орчны хэрэглээг тань овжноор ашиглах залилагчдын арга нарийсаж байна. 

Сүүлийн 10 жилийн хугацаанд залилан 60 орчим хувиар өссөнийг доорх графикаас харах боломжтой. Харин хулгайн гаралт 2018 оноос хойш тодорхой хэмжээнд буурчээ. 

График1: Залилан ба хулгайн гэмт хэрэг (2015-2024 бүтэн жил, 2025 оны эхний 9 сар)

Тухайлбал энэ сард залилах гэмт хэрэг үйлдсэн хоёр этгээдийг цагдаагийн байгууллагаас илрүүлж, баривчилсан байдаг.  

Иргэдийг залилан мэхэлсэн хоёр этгээдийг баривчилсан тухай: 

Цахим орчинд 1,533 удаагийн гүйлгээгээр иргэдээс 2.8 тэрбум төгрөг залилсан байж болзошгүй 43 настай, эмэгтэй “Т”-г энэ сарын эхээр баривчилсан. 

 

Эх сурвалж: ЦЕГ

Залилах гэмт хэрэгт сэрдэгдэн цагдаагийн байгууллагаас 64 удаа эрэн сурвалжлагдаж байсан 33 настай этгээдийг баривчилж, саатуулсан талаар мэдээлсэн билээ. 

 

Эх сурвалж: ЦЕГ

Он гарсаар эхний есөн сард нийт 13,393 залилах гэмт хэрэг цагдаагийн байгууллагад бүртгэгдсэн талаар өмнө нь мэдээлсэн билээ.  

Гэхдээ залилангийн 85.1 хувь нь цахим орчинд үйлдэгдсэн буюу 11,402 иргэн онлайнаар бараа захиалах, хандив өгөх, сугалаанд оролцох болон бусад байдлаар мөнгө санхүү, эд хөрөнгө, сэтгэл санаагаараа хохирч үлджээ. 

График2: Цахим залилангийн үйлдлийн арга (2024, 2025 оны эхний есөн сар)

Тэрбээр "Магадгүй бид өдөр тутамдаа гэмт хэргийн кэйстэй тулгарч байгаа болохоор харьцангуй мэддэг байх. Жишээ нь би өөрийгөө эмч хүн байя гэж бодъё. Тэгтэл өвчтөн хүндэрсэн шатандаа ороод ирлээ.

Эмч мянга хичээгээд өвчтөнийг 100 хувь төгс эдгээж чадахгүй шүү дээ. Яг л үүнтэй адил. 

Хамаг юм аа алдчихсан хүн ороод ирэхэд хохирлыг нь барагдуулчих юм сан, ядаж сэтгэлийг нь өргөчих юм сан гэдэг бодол байгаа.

Гэхдээ өвчнөө үгдрүүлсэн хойно эмч дээр очоод 100 хувь эрүүл болохгүйтэй адилхан асуудал юм.

Мөнгөн хохирлоо олж авлаа гэж бодоход тэр бүхнийг буцааж авахын тулд зарцуулсан энерги, нерв, стресс, цаг хугацаа эргэж хэзээ ч олдохгүй.

Тэр асуудлаас болж ар гэрийнхэн нь сэтгэл зүйн хор хохирлыг дагаад амсаж байдаг. "Харваас залилан байхад яах гэж мөнгөө өгч байгаа юм бэ", "Чи тэнэг, мангар юм уу" гэхчлэн ойр тойрныхон хэлэх нь мэдээж. Гэвч нэгэнт мөнгөө алдаад эхэлчихсэн хүн бусдын анхааруулгыг үл тоон, алдсанаасаа илүүг олохын төлөө шунаж, сэтгэл зүй нь тогтворгүй болчихсон байдаг.

Адилтгаж хэлбэл, буцалсан ус руу гараа дүрэх үү, болих уу гэж тээнэгэлзэж байх шиг мөнгөө хийх үү, байх уу гэдгээс өөрийг бодохоо больчихдог" гэдгийг анхааруулж байлаа.

Үргэлжлэл бий...