Засгийн газрын гишүүд ээ! Хүүхдийн эрхийн төлөөх олон жилийн тэмцлийг морьтой жагсагчдын нэг өдрийн жагсаалаар сольдгийн учир юу вэ?

Гэрэл зургийг mpa.mn

Засгийн газрын өнөөдрийн хуралдаанаар хаврын морин уралдаан зохион байгуулах эрхийг аймаг, орон нутгийн удирдлагуудад шилжүүллээ. 

Өмнө нь 2019 оны нэгдүгээр сарын 30-ны өдөр жил бүрийн 11 дүгээр сарын 1-ний өдрөөс тавдугаар сарын 1-ний өдрийн хугацаанд хурдан морины уралдаан, сунгаа, үсэргээ зохион байгуулахыг хориглох тухай Засгийн газрын тогтоол гарч байсан юм. 

Гэтэл өмнөх шийдвэрээсээ эргэж буцсан алхмыг Засгийн газар өнөөдөр хийж, манай улс хүүхдийн эрхийн асуудалд ухралт хийв. 

Хүүхдийн төлөө үндэсний зөвлөлийн тэргүүн Ерөнхий сайд Л.Оюун-Эрдэнэ болон Засгийн газрын гишүүдээ! хаврын хахир хүйтэн цагт хүүхдээр морь унуулж буй асуудлаар олон жил тэмцэж ирсэн хүмүүсийн хүч, хөдөлмөрийг морьтой жагсагчдын нэг өдрийн жагсаалаар сольж байгаагийн учир юу вэ? 

Засгийн газрын гишүүн, хүүхдийг хамгаалах асуудалд хамгийн түрүүнд дуу хоолойгоо хүргэх ёстой Гэр бүл, хөдөлмөр, нийгмийн хамгааллын сайд Л.Энх-Амгалан "Дабл стандарт гарч ирээд байна. Би ч гэсэн адууны захад өссөн, хурдан морь унаж байсан хүүхэд" гэж өөрийн хувийн итгэл үнэмшлээ илэрхийлэв.

Хаврын морин уралдаан гэсэн нэг л асуудал ярьж байгааг хамгийн сайн мэдсээр байж зуны уралдаантай хольж хутган, өөрийн үүх түүхээ ярьж илтэд ашиг сонирхлоо илэрхийлэх нь ёс зүйн хувьд байж болох асуудал уу Сайд аа?

 

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн Газрын таван гишүүн 5-146 тооны хурдан удмын адуутай байна 

Түүнчлэн Засгийн газарт: 

• Ерөнхий сайд Л.Оюун-Эрдэнэ 5 
• Гадаад харилцааны сайд Б.Батцэцэг 5 
• Сангийн сайд Б.Жавхлан 75 
• Монгол Улсын сайд, Хяналт, үнэлгээний Үндэсний хорооны дарга Э.Одбаяр 50 
• Цахим хөгжил, инновац, харилцаа холбооны сайд Ц.Баатархүү 146 тооны хурдан удмын адуутай байна. 
• Мөн Л.Оюун-Эрдэнийн Засгийн Газарт нэг алдарт уяач байдаг нь Аж үйлдвэр, эрдэс баялгийн сайд Ц.Туваан юм.

Уг баримт болон ГБХНХЯ-ны сайдын хэлсэн үг зэргээс харахад уг шийдвэрт ашиг сонирхлын зөрчил гарсан байж болзошгүй гэж харж болохоор байна. 

Мөн Засгийн газар өөрөө хариуцлагаас зугтаж орон нутгийн удирдлагад эрх мэдлийг шилжүүлж байгаа, Засгийн газрын шийдвэрээр уяачдад цол тэмдэг олгодог зэрэг анхаарал татсан асуудал олон байгаа юм.  

Ерөнхий сайд Л.Оюун-Эрдэнийн тэргүүлдэг Хүүхдийн төлөө үндэсний зөвлөл нь хүүхдийн эрхийн тухай хуулийн 16 дугаар зүйлд заасны дагуу хүүхдийн эрхийг хангах, эрх нь зөрчигдөхөөс урьдчилан сэргийлэх, хүүхэд хамгаалал, хөгжлийн талаарх төрийн бодлого, хууль тогтоомжийг хэрэгжүүлэхэд нийгмийн нөөц баялгийг дайчлах, салбар дундын үйл ажиллагааг уялдуулан зохицуулах, холбогдох төрийн байгууллагад чиглэл, хуулийн этгээдэд зөвлөмж өгөх чиг үүрэгтэй гэдгийг ахин сануулъя.   

Дүнжингарав хаврын уралдааны хэсгээс... Гуравдугаар сар.