"Энэ онд улсын хэмжээнд нийт 50 сая мод тарихаар төлөвлөснөөс 35.2 сая мод тариад байна"
“Тэрбум мод” үндэсний хөдөлгөөний хүрээнд энэ оны есдүгээр сарын 20-ны өдрөөс аравдугаар сарын 31-ний өдрийг хүртэл “Алтан намар–Мод тарих улирал” нөлөөллийн ажлыг улсын хэмжээнд зохион байгуулж байна.
Уг үндэсний хөдөлгөөн эхэлснээс хойш улсын хэмжээнд нийт 140.4 сая орчим мод тарьж ургуулаад байгаа бөгөөд үүний үр дүнд манай орны ойрхог чанар 7.9 хувиас 8.71 хувь болж өслөө.
Өнөөдрийн байдлаар улсын хэмжээнд 1,267–1,780 га талбайд мод үржүүлгийн газрууд үйл ажиллагаа явуулж байна. Эдгээр газрууд 57 зүйлийн навчит болон шилмүүст модны 113.8 сая тарьц, суулгац, 21.6 тонн үрийн нөөц бүрдүүлээд байна. Мөн ойн салбарын 1,264 инженер, 6,354 ойжуулагч, техникчийг бэлтгэн, салбарын хүний нөөц болон мэргэжлийн чадавхыг үе шаттайгаар нэмэгдүүллээ.
Түүнчлэн түймэрт өртсөн болон доройтсон ойн талбайг нөхөн сэргээх, ойжуулах ажлыг эрчимжүүлж байна. Мод тарих, арчлах, хамгаалах цогц арга хэмжээнд төр, хувийн хэвшил, олон улсын байгууллага, иргэдийн оролцоог нэмэгдүүлэхэд анхаарч байна.
“Тэрбум мод” үндэсний хөдөлгөөн нь зөвхөн мод тарихаар хязгаарлагдахгүйгээр ойн санг нэмэгдүүлэх, цөлжилт, газрын доройтлыг бууруулах, уур амьсгалын өөрчлөлтийн сөрөг нөлөөг сааруулах, ногоон хөгжлийн суурийг бүрдүүлж ирээдүй хойч үедээ ногоон өв үлдээх үндэсний хэмжээний бодит ажил болон хэрэгжиж байна гэж Цагдаагийн Ерөнхий Газар(ЦЕГ)-ын Урьдчилан сэргийлэх газраас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
