Филиппинээс ЕБС-уудад англи хэлний 200 багш ажиллуулахад нийслэлийн төсвөөс ₮3.9 тэрбум шаардагдах тооцоолол гарчээ
Нийслэлийн Иргэдийн Төлөөлөгчдийн Хурлын(НИТХ) Хүний хөгжлийн хорооны хуралдаан өнөөдөр болж, нийслэлийн ерөнхий боловсролын сургуулиудын англи хэлний багшийн дутагдлыг Филиппин багш нараар нөхөх тухай Ажлын хэсгийн санал дүгнэлтийг хэлэлцжээ.
Нийслэлийн боловсролын газрын дарга Б.Амартүвшингийн танилцуулснаар өнөөдрийн байдлаар төрийн өмчийн 332 сургуульд 336 мянга гаруй сурагч англи хэлний хичээлийг судалж байгаа бөгөөд англи хэлний 1,403, англи орос хэлний 129 нийт 1,532 багш 7 хоногт нийслэлд 38,324 цагийн англи хэлний хичээлийг заадаг байна. Багшийн 7 хоногийн ачааллыг дунджаар 22 цагаар тооцож үзэхэд нийслэлийн хэмжээнд 210 англи хэлний багшийн дутагдалтай байгаа аж.
Ерөнхий боловсролын сургуулиудаас авсан судалгаагаар өнгөрсөн гуравдугаар сарын 11-ний өдрийн байдлаар нийслэлийн 8 дүүргийн төрийн өмчийн 87 сургуульд 181 багшийн сул орон тоо байгаа аж. Иймд Нийслэлийн боловсролын газраас ерөнхий боловсролын сургуулиудад гадаадаас англи хэлний багш ажиллуулж байгаа туршлагыг үндэслэн шаардагдах зардлын тооцооллыг 200 багшаар хийж үзсэн бөгөөд нийслэлийн төсвөөс 3.9 тэрбум төгрөг шаардагдах тооцоолол гарчээ.
Гадаад багш нарыг ажиллуулах нь сурагчдад англи хэлний мэдлэгийг өндөр түвшинд олгоход чухал бөгөөд багш нарын мэргэжлийн ур чадвар, заах арга зүйг сайжруулах, ерөнхий боловсролын сургуулийн багшийн хүртээмжийг нэмэгдүүлэхэд үр нөлөөтэй гэж үзжээ.
НИТХ-ын Хүний хөгжлийн хорооны дарга, төлөөлөгч Ү.Оюунзул "Нийслэл хотын ерөнхий боловсролын сургуулийн 300,000 гаруй сурагч англи хэлний хичээлд хамрагддаг. Эдгээр хүүхдэд англи хэлний 1,500 багш хичээл заадаг бөгөөд англи хэлний 200 орчим багшийн дутагдалтай байна. Филиппин улсаас багш нарыг Улаанбаатар хотод авчирч, сурагчид болон багш нарыг чадавхжуулах хөтөлбөрийг хэрэгжүүлэх гэж буйтай холбогдуулан өнөөдөр хэлэлцүүлэг зохион байгууллаа" гэв.
Тус асуудлыг ирэх долоо хоногийн Даваа гарагт болох НИТХ-ын ээлжит VII хуралдаанаар хэлэлцүүлэхээр болов.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
