Үндсэн хуулийн цэцийн гишүүн Л.Өлзийсайхан ажлаа өгч, УИХ-ын Тамгын газрын ерөнхий нарийн бичгийн даргаар дахин томилогдох гэж байна
Үндсэн хуулийн цэцийн гишүүн Л.Өлзийсайхан өчигдөр /2025.11.27/ чөлөөлөгдөх хүсэлтээ өгчээ. Улмаар яг одоо Хууль зүйн байнгын хороо хуралдаж, Л.Өлзийсайханы Үндсэн хуулийн цэцийн гишүүнээс чөлөөлөгдөх хүсэлтийг хэлэлцэж байна.
Түүнийг Үндсэн хуулийн цэцийн гишүүнээс чөлөөлсний дараа УИХ-ын Тамгын газрын ерөнхий нарийн бичгийн даргаар томилох асуудлыг хэлэлцэн шийднэ. Уг албыг хашиж байсан Б.Баасандорж өөрийн хүсэлтээр чөлөөлөгдөх өргөдлөө өгсөн учир дараагийн УИХ-ын даргын зүгээс Л.Өлзийсайханд ажлын санал тавьсан аж.
Л.Өлзийсайхан нь 2019-2023 онд УИХ-ын Тамгын газрын ерөнхий нарийн бичгийн даргаар ажиллаж байсан юм.
Харин 2023 оны арваннэгдүгээр сарын 16-ны өдөр тухайн үеийн УИХ-ын дарга Г.Занданшатарын санал болгосноор Үндсэн хуулийн цэцийн гишүүнээр томилогдож байв.
Ийнхүү Л.Өлзийсайхан шинэ удирдлагатайгаар хуучин ажилдаа эргэн орж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
