Ханын материалын 1,800 айлын орон сууцыг барих тендерт "Материалимпэкс" зэрэг гурван компани шалгарчээ

Сонгинохайрхан дүүргийн тавдугаар хороо, Ханын материалд 3,000 айлын орон сууцны төслийг 20.7 га талбайд 2025-2029 онд хоёр үе шаттай хэрэгжүүлэхээр төлөвлөжээ.

Төслийн нэгдүгээр үе шатанд 12.6 га талбайд 1,800, хоёрдугаар үе шатанд 1,200 айлын орон сууцыг 8.1 га талбайд барих бөгөөд 1,800 айлын орон сууцны 232 нэгж талбарыг чөлөөлж, гүйцэтгэл 93.9 хувьтай үргэлжилж байгаа аж.

Эхний ээлжийн 1,800 айлын орон сууцны барилгын ажлыг “Материалимпэкс” ХК, “Материалимпэкс констракшн” ХХК болон “Конконсалтинг” ХХК-ийн түншлэл гүйцэтгэхээр тендерт шалгарчээ. Төслийн гүйцэтгэгчийг сонгон шалгаруулах нээлттэй тендерийг өнгөрсөн зургаадугаар сарын 24-нд зарласан бөгөөд нийт гурван компани саналаа ирүүлжээ.

Уг төслийн хүрээнд:

• 1,800 өрхийн 7-9 давхар бүхий 24 орон сууц, 
• 240 хүүхдийн ортой хоёр цэцэрлэг, 
• 400 хүүхдийн суудалтай оффис, сургалт хөгжлийн төв, 
• 1,200 машины ил болон дулаан зогсоол /180 хөгжлийн бэрхшээлтэй иргэний авто зогсоол/
• Худалдаа болон үзвэр үйлчилгээний төв
• Спорт байгууламж зэргийг барих бол төслийн нийт талбайн 60 хувьд нийтийн зориулалттай цэцэрлэгт хүрээлэн, явган хүний болон дугуйн зам, тоглоомын талбай, гэрэлт гудамж, ногоон байгууламжийг цогцоор нь шийдэх гэнэ.