"Ямар үндэсний хоолны өдөрлөг хийх саналыг иргэдээс авч “UB food” фестивалийг жил бүр зохион байгуулна"

Төв талбайд өчигдөр нээгдсэн олон орны хоолны соёлыг таниулах “UB food” фестиваль энэ сарын 14-ний өдрийг дуустал үргэлжилнэ.

Фестивальд Узбекистан улсын Ташкент хотоос ирсэн 10 тогооч үндэсний хоол болох плов болон шашлык, казань кебаб, самса гэсэн дөрвөн төрлийн хоолыг бэлтгэж, Улаанбаатар хотын иргэдэд амтлуулж байгаа юм.

Энэ үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар “Бид жил бүрийн дөрөвдүгээр сарын хоёр дахь долоо хоногт үндэсний болон олон орны хоолны соёлыг иргэд, жуулчдад таниулах “UB food” фестивалийг зохион байгуулна. Учир нь манай улсад аялал жуулчлалын улирал үндсэндээ зургаа, долоодугаар сард эрчимтэй явагддаг.

Харин аялал жуулчлалын эрчим сул байдаг дөрөв, тавдугаар сард аялагч, жуулчдыг татах зорилгоор “UB food” фестиваль шиг олон улсын арга хэмжээг зохион байгуулахыг зорьж байна.

Улаанбаатар хотын иргэдэд олон үндэстний хоолны соёлыг сонирхуулж, дараа дараагийн жилд ямар үндэсний хоолны өдөрлөг хийх саналыг иргэдээс авч, судалгааны үндсэн дээр өдөрлөгийг цаашид зохион байгуулна. Олон үндэстний хоолны өдөрлөгийг дагасан аялал жуулчлалыг нэмэгдүүлэх төлөвлөгөөг боловсруулж байна” гэсэн юм.

Узбек хоол амталсан гадаад, дотоодын иргэд сэтгэгдэл өндөр байгаагаа илэрхийлсэн бол зарим иргэн асарт орж үймээн дэгдээсэн үйл явдлууд өчигдөр өрнөв. Түүнчлэн дэмий зүйлд татвар төлөгчдийн мөнгийг үрж байна гэх шүүмжлэл гарч байна.

“UB food” фестивалийн өнөөдрийн хөтөлбөр:

 

“UB food” фестивалийг зохион байгуулж буй асар нь Монгол Улсад баригдсан хамгийн том асар. Тус арга хэмжээ дууссаны дараа энэхүү асарт Циркийн долоо хоног арга хэмжээ, үргэлжлүүлэн и-спорт, шагайн спорт, 3х3 сагсан бөмбөгийн тэмцээнийг зохион байгуулахаар төлөвлөжээ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав