Ойрх Дорнодод хийсэн нууц тохиролцооны улмаас Путин, Кадыров нарын харилцаа муудсан тухай мэдээлжээ

Сүүлийн саруудад ОХУ-ын ерөнхийлөгч Владимир Путин, Чеченийн тэргүүн Рамзан Кадыров нарын харилцаа муудсан тухай Оросын эрэн сурвалжлах сэтгүүлзүйн iStories (Важные истории) сайт мэдээлжээ.

Оросын аюулгүй байдлын албанд одоо ажиллаж байгаа болон өмнө нь ажиллаж байсан эх сурвалжуудын өгсөн мэдээллээр бол Ойрх Дорнодын аль нэг улсын эрх баригчидтай Кадыровын хийсэн нууц тохиролцоо ийм зөрчилд хүргэсэн гэнэ.

Тэрбээр Чеченьд засаглах хугацаа нь дууссаны дараа гэр бүлийнхээ аюулгүй байдлыг хангуулах тохиролцоог Ойрх Дорнодын нэг улсын эрх баригчидтай хийжээ.

iStories сайт чухам аль улс болохыг мэдээндээ дурдаагүй байна.

Кадыровын хувьд Ойрх Дорнодын орнуудын язгууртнуудтай найрсаг харилцаатай байдаг.

Тэрбээр Арабын Нэгдсэн Эмират Улсад байнга зочилдог бөгөөд тус улсын Палм Жумейрагийн хиймэл арал дээр оршдог тансаг харшийг 2014 оноос хойш Чеченийн албан бус элчин сайдын яам болгосон гэх мэдээлэл бий.

Кадыров нь Кремльд үнэнч байх амлалтынхаа хариуд Чеченийг 20 орчим жил дангаар захирч байгаа хүн юм.

Гэхдээ сүүлийн жилүүдэд түүний эрүүл мэнд муудаж, эрх мэдлээ шилжүүлж болзошгүй болоод байгаа.

Ингэсэн тохиолдолд Кремлийн зүгээс гэр бүлд нь өгөх аливаа баталгаанд Кадыров итгэхгүй байгаа тухай дээрх мэдээнд өгүүлжээ.

Оросын Холбооны Аюулаас Хамгаалах Албаны нэрээ нууцалсан эх сурвалжуудын мэдээлснээр Ойрх Дорнодын нэг орны эрх баригчидтай Кадыровын нууцаар хийсэн тохиролцоо Путинийг хилэгнүүлсэн гэнэ.

Кадыровын сүүлийн үед хийж байгаа алхмууд ч түүнийг эрх мэдлээ шилжүүлэхэд бэлдэж байж болзошгүйг харуулж байна.

Тухайлбал тэр саяхан Чеченийн шадар сайдын албан тушаалаас охин Айшатаа чөлөөлж, хувийн бизнес, эд хөрөнгөө гэр бүлийнхээ гишүүдийн нэр дээр шилжүүлжээ.

Путин, Кадыров нарын зөрчил Оросын төрийн думын гишүүн Адам Делимхановын статуст ч бас нөлөөлж эхэлсэн мэдээлэл байна.

Тухайлбал Кадыровын шадар хүн Делимхановын эрх мэдлийг Москвагийн эрх баригчид хязгаарлаж эхэлснийг Чеченийн идэвхтэн Ансар Дишни iStories сайтад мэдээлжээ.

Эх сурвалж: iStories.media