Пак Юн Чул: Перу улсын метро төсөл орц, гарцын газрыг чөлөөлж өгөөгүйгээс одоог хүртэл ашиглалтад ороогүй

Гэрэл зургийг MPA агентлагийн онцгой зөвшөөрөлтэйгөөр ашиглав

Улаанбаатар хотын метро төслийн шинэчилсэн ТЭЗҮ-ийг НИТХ-аас өчигдөр баталсан юм.

НИТХ-ын хуралдаанд БНСУ-ын “Духа Инженеринг” компанийн зөвлөх үйлчилгээний багийн захирал Пак Юн Чул оролцсон бөгөөд метро төслийг хэрэгжүүлж байгаа дэлхийн улс орнуудад тулгардаг эрсдэлийг танилцуулсан юм.

Тэрбээр "Метроны ижил төстэй төслүүдийн амжилтгүй болсон туршлагуудаас танилцуулъя. Өмнөд Америкийн Перу улсын 49 өртөөтэй метроны төсөл дээр ажиллаж байсан. Уг төслийн төсөвт өртөг нь 5.9 тэрбум ам.доллар, таван жилийн хугацаанд хэрэгжүүлэх төсөл. Гэвч одоог хүртэл ашиглалтад ороогүй, гүйцэтгэлийн явц нь 60%-тай байна. Үүнд  их, бага хэмжээний эрсдэлүүд байгаа хэдий ч хамгийн гол шалтгаан нь захиалагч буюу тухайн орноос газар чөлөөлөлтийг шийдэж өгөөгүйгээс болсон. Перугийн метро төслийн ерөнхий гүйцэтгэгч Испанийн компани. Метроны өртөөний орц, гарцыг шийдэх жижигхэн газрыг чөлөөлж өгөөгүйгээс гүйцэтгэгч компани барилга угсралтын ажил хийх боломж бүрдээгүй юм.

Тийм болохоор Улаанбаатар хотын метро төслийн газар чөлөөлөлтийг шийдэж өгөх нь чухал асуудлуудын нэг гэдгийг дахин хэлье. 

Перугийн метро төсөлд гарсан дараагийн асуудал нь захиалагч талтайгаа инженерийн технологио зөвшилцсөн ч захиалагч талаас тодорхойлж өгөөгүй байсан" гэж ярилаа.

Метроны нэгдүгээр шугамыг Энхтайвны өргөн чөлөө дагуу Толгойтоос Амгалан чиглэлд 15 өртөө, нэг депо бүхий 19.4 км урт байх бөгөөд 19.1 км үргэлжлэх 14 өртөө нь газар доогуур, нэг өртөө нь газрын түвшинд байрлана. 

Улаанбаатар хотын метро ТЭЗҮ-д тусгасан төлөвлөгөөний дагуу таван жилийн дараа буюу 2030 оны аравдугаар сард ашиглалтад орох юм байна.