Монгол хүү Чехийн дээд лигийн багтай гэрээ байгууллаа

Чехийн I лигийн "Ческе-Будеёвице Динамо" клуб өнөөдөр хоёр тоглогчтой шинэ гэрээ байгуулснаа зарлалаа. Тэдний нэг нь төвийн довтлогч Гантогтохын Төгөлдөр юм. 

Монголын хөлбөмбөгийн "Арвис" клубээс тамирчны гараагаа эхлүүлсэн Г.Төгөлдөр 2019 оноос эцэг эхийнхээ хамтаар Чех рүү нүүсэн. Орон нутгийн "Табор" клубийн академид суралцаж эхэлсэн тэрбээр 2022 оноос "Динамо"-гийн академи руу шилжсэн байна.

2023 оны арваннэгдүгээр сард "Динамо"-гийн үндсэн багийн зарим тоглогч бэртэлтэй байсан тул Г.Төгөлдөрийг бүрэлдэхүүнд багтааж байв. 

Тэр тоглолтод сэлгээгээр талбайд гарснаар Чехийн лигт тоглосон анхны монгол хөлбөмбөгчин болсон билээ.

Энэ улиралд клубийнхээ Б багт найман тоглолтод оролцохдоо гурван гоол оруулсан монгол довтлогч одоогоор бэртэлтэй байгаа тул талбайд шууд гарах боломжгүй байгаа аж.

Тэрбээр энэ талаар "Мэргэжлийн анхны гэрээгээ байгуулсандаа баяртай байна. Надад их урам зориг өглөө. Одоогоор бэртэлтэй байгаа ч бэлтгэлдээ орсон. Улам эрчтэй эргэж ирнэ гэдэгтээ итгэлтэй байна" гэж ярьжээ.

Тэгвэл менежер Михал Ракован "Төги манай академид хоёр улирлыг өнгөрүүлсэн. Хэдийгээр хүнд бэртэл авсан ч эдгэрч байгаа. Бид түүний ирээдүйд итгэж байгаа тул мэргэжлийн гэрээ байгуулсандаа сэтгэл хангалуун байна" гэж онцлов.

 

125 жилийн түүхтэй "Динамо"-гийн хувьд 1993 оноос Чехийн дээд лигт тоглож буй юм. 1993 - 1994, 1996 - 1997 оны улиралд зургаадугаар байр эзэлсэн нь тус клубийн хувьд оргил амжилт. 

Энэ улиралд 21 тоглолтын дараагаар дөрөв тэнцэж, 17 хожигдоод байна. 

Эх сурвалж: www.skcb.cz