Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Засгийн газраас Монгол, Францын хамтарсан “Бадрах Энержи” ХХК-ийн хөрөнгө оруулагч, Бүгд найрамдах Франц улсад бүртгэлтэй “Орано Майнинг” компанитай байгуулах хөрөнгө оруулалтын гэрээнд гарын үсэг зурах ёслолын үйл ажиллагаа өнөөдөр Төрийн ордонд боллоо. 

Орано Майнинг С.А.С-ын ТУЗ-ын дарга Николас Маэс "Уг гэрээг байгуулснаар хоёр тал удаан хугацааны харилцан ашигтай, шинэ цар хүрээтэй болж, Монгол, Франц улсуудын найрсаг хамтын ажиллагааг бэхжүүлж байна.

Гэрээг байгуулсан нь Орона группийн олборлолтын арга технологи, хөдөлмөрийн аюулгүй байдал, байгаль орчин хамгаалал болон орон нутгийн хөгжилд оруулж ирсэн туршлагыг өндрөөр үнэлж байгаагийн илэрхийлэл боллоо. 

Уг төслийг илэрхийлж байгаа тоо баримтууд үнэхээр гайхалтай юм. 90,000 тонн ураны нөөцтэй, 30 жилийн хугацаанд ажиллах уурхайн нийт капитал зардал нийт 1.6 тэрбум ам.доллар байна. Үүний зэрэгцээ төслийн хүрээнд 1,600 шууд болон шууд бус ажлын байр бий болж, тус ажлын байруудад дийлэнхдээ монгол улсын иргэд ажиллана. Энэ уурхайгаас жил бүр олборлох уранаар үйлдвэрлэх эрчим хүч нь 55 сая тонн нүүрснээс гаргах эрчим хүчтэй тэнцэх юм. 

Ингэснээр уурхай ажиллах хугацаанд дөрвөн тэрбум тонн нүүрсхүчлийн хий үйлдвэрлэхээс урьдчилан сэргийлэх төдийгүй монгол улсыг уур амьсгалын өөрчлөлттэй тэмцэхэд идэвхтэй хувь нэмэр оруулахад дэмжлэг үзүүлнэ. 

Орона группийн хувьд энэ төслийг хэрэгжүүлснээр дэлхий даяар цөмийн эрчим хүч үйлдвэрлэж буй бүх үйлдвэрлэгчдэдээ ураны бүтээгдэхүүний нийлүүлэлтийг солонгоруулж байна. Монгол Улсын хувьд эдийн засгийн хөгжлөө хурдасгах төдийгүй цөмийн салбарт стратегийн ач холбогдол бүхий тоглогч болох боломж бүрдэж байна. 

"Монгол Улсын уран олборлолтын салбарын хөгжилд жишиг болох уурхайн суурийг бид тавьж байна"

Хөрөнгө оруулалтын гэрээгээр төслийн шууд үр өгөөжийн дийлэнх Монгол Улсад ирэх явдлыг баталгаажуулсан. Иймдээ ч Монгол Улсын эдийн засгийг тогтвортой өсөхөд тодорхой хувь нэмрээ оруулах юм.

Орона групп нь гэрээний хүрээнд олон улсын шилдэг стандарт нормыг хэрэгжүүлж, байгаль орчныг хамгаалах, хариуцлагатай уул уурхайг хөгжүүлэх үүрэг хүлээж байна. Үүний зэрэгцээ орон нутгийн иргэдийг дэмжих хөгжлийн болоод хамтын ажиллагааны хөтөлбөрүүдийг хэрэгжүүлнэ. Ингэснээр Монгол Улсын уран олборлолтын салбарын хөгжилд жишиг болох уурхайн суурийг бид тавьж байна" гэв.