"Хавдар судлалын эмнэлгийг барих санхүүжилтийг Ерөнхийлөгч холбогдох байгууллагуудтай хамтарч шийдвэрлэнэ"

Сонгинохайрхан дүүргийн 34 дүгээр хорооны нутаг дэвсгэрт “Хавдар судлалын үндэсний хоёрдугаар төв”-ийг барихад инженерийн дэд бүтцэд бүрэн холбогдсон 15 га газрыг нийслэлээс өгчээ.

Өнөөдрийн байдлаар тус төвийн зураг төслийн ажил үргэлжилж байгаа бөгөөд бүтээн байгуулалтын ажлыг ирэх зургаадугаар сард эхлүүлэх юм байна. Ингэснээр Улаанбаатар хотын баруун, зүүн хэсэгт хавдар судлалын эмнэлэгтэй болох нь.

Энэ талаар Нийслэлийн Засаг дарга бөгөөд Улаанбаатар хотын Захирагч Х.Нямбаатар “ХСҮТ-ийг анх Улаанбаатар хотыг 500 мянган хүн амтай байхад байгуулж байсан бол 2024 оны арванхоёрдугаар сарын 31-ний статистикаар нийслэл хотод 1.8 сая хүн амьдарч, ажиллаж байна. Хавдрын тусламж үйлчилгээг хүртээмжтэй үзүүлэхэд одоо байгаа эмнэлгийн ачаалал хүрэлцэхгүй байгаа.

Сүүлийн жилүүдэд агаарын бохирдлоос үүдэлтэй хавдрын өвчлөлийн тоо нэмэгдэж байгааг эрүүл мэндийн салбарынхан хэлж байгаа. Тиймээс  хавдрын эрт үед илрүүлэг, үзлэг оношилгоо, эмчилгээ, судалгаа шинжилгээ явуулах эрүүл мэндийн цогцолбор төвийг барихад шаардлагатай газрыг шийдвэрлээд байна.

Тодруулбал Сонгинохайрхан дүүргийн 34 дүгээр хороо, Баянголын аманд инженерийн дэд бүтцэд бүрэн холбогдсон 15 га газрыг өгсөн. ЭМЯ-наас өгсөн захиалгын дагуу хавдрын эмнэлгийн зураг, төсвийн ажлууд хийгдэнэ. Эмнэлгийг барих санхүүжилтийн эх үүсвэрийг Монгол Улсын Ерөнхийлөгч холбогдох байгууллагуудтай хамтарч шийдвэрлэхээр ажиллаж байгаа. 

Тус төвийн бүтээн байгуулалтын ажил ирэх зургаадугаар сард эхэлнэ” гэж мэдээллээ.

Харин Ерөнхийлөгчийн зүгээс "Зөвхөн улсын төсөв гэлтгүй гадаад харилцааг ашиглан энэхүү эмнэлгийн төслийг урагшлуулах бодолтой байна" гэв.

 

Баянголын аманд инженерийн шугам сүлжээнд холбогдсон 50 орчим га газар байгаагаас 15 га газрыг хавдрын эмнэлэг барихад олгосон байна. Цаашид улсын онц чухал ажлуудад уг газраас олгоно гэж хотын дарга мэдэгдэв.

Нийслэлээс эмнэлгийн гадна тохижилтын ажил болон эмнэлэг хүртэлх авто замыг өргөсгөх ажлуудыг хийхээр төлөвлөжээ.