Н.Алтаншагай: Хавдар Судлалын Үндэсний Төв II-ыг Баянголын аманд барихаар төлөвлөсөн

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын Ерөнхийлөгч У.Хүрэлсүх өчигдөр буюу арванхоёрдугаар сарын 16-ны өдөр 47 дугаартай захирамж гаргасан юм. Тодруулбал Хавдар Судлалын Үндэсний II Төв эмнэлэг байгуулахад дэмжлэг үзүүлэхээр Монгол Улсын Ерөнхийлөгчийн ахлах зөвлөх Н.Хүрэлбаатараар ахлуулсан Ажлын хэсэг байгуулснаа мэдэгдсэн.

Уг Ажлын хэсэгт Сангийн сайд Б.Жавхлан, Эрүүл мэндийн сайд Т.Мөнхсайхан, УИХ-ын гишүүн Ж.Чинбүрэн, Н.Алтаншагай, Л.Мөнхбаясгалан, Засгийн газрын хэрэг эрхлэх газрын дэд дарга У.Бямбасүрэн, Эдийн засаг, Хөгжлийн Яамны Төрийн нарийн бичгийн дарга И.Батхүү, Монгол Улсын Засгийн газрын Цөмийн энергийн комиссын нарийн бичгийн дарга Г.Манлайжав, Анагаахын Шинжлэх Ухаан Үндэсний Их Сургуулийн ректор Б.Дамдиндорж, нарийн бичгийн даргаар Хавдар Судлалын Үндэсний Төвийн ерөнхий захирал Н.Эрдэнэхүү нар багтсан болохыг Н.Хүрэлбаатар танилцууллаа.

Энэ талаар УИХ-ын гишүүн Н.Алтаншагай "Хавдар Судлалын Үндэсний Төв II-ыг барихаар олон жил ярьсан. Байршлын хувьд хоёр удаа солигдож гурав дахь удаагаа Сонгинохайрхан дүүргийн 34 дүгээр хороо буюу Баянголын аманд 12 га талбайг холбогдох журмын дагуу шийдвэрлэсэн.

Мөн Ажлын хэсэг байгуулагдаад гурван га талбайг нэмж, цэцэрлэгт хүрээлэн барихаар боллоо. 

Найрамдал зуслан руу явах зам дагуу буюу цэвэр, бохир, дулаан, цахилгаан гэх мэт дэд бүтэц нь бүрэн шийдэгдсэн талбайг сонгосон юм. 2025 оны Нийслэлийн Засаг Даргын газар зохион байгуулалтын төлөвлөгөөнд бүрэн тусгагдсан.

Газрын асуудал арванхоёрдугаар сарын 24-нд бүрэн шийдэгдээд эмнэлэг барих ажил бэлэн болно. 

Баруун бүсэд барьж байгааг хүмүүс их сонирхож байна. Түгжрэлийг бууруулах ажлын хүрээнд энэ бүсэд эмнэлэг барих нь оновчтой гэж үзэж байгаа. Түүнчлэн тухайн бүсэд олон гарц, дэд бүтэц шинээр хийж байна. Тухайлбал эмнэлгийн хойд талд нь тойрог хурдны зам барихаар тооцоолол хийсэн" гэж онцоллоо.