Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улс болон Евразийн Эдийн Засгийн Холбоо(ЕЭЗХ) хооронд байгуулах гэж буй чөлөөт худалдааны түр хэлэлцээрийн хүрээнд ямар төрлийн бараа бүтээгдэхүүнийг харилцан татваргүйгээр нийлүүлэх гэж байгаа талаар Эдийн Засаг, Хөгжлийн Яам(ЭЗХЯ)-наас тодрууллаа. 

ЕЭЗХ-нд Орос, Беларусь, Армени, Казахстан, Киргизстан гэх таван улс багтдаг.

Үүнд ЭЗХЯ-ны Хөрөнгө оруулалтын нэгдсэн бодлого, зохицуулалтын газрын дарга Б.Анар "Монголын талаас Евразийн Эдийн Засгийн Холбооны таван улсад гурван гол төрлийн бараа бүтээгдэхүүнийг нийлүүлэхээр байна. 

• Тэрбум орчим ам.долларын мах, махан бүтээгдэхүүний зах зээл рүү 59 нэр төрлийн бүтээгдэхүүнийг гаалийн татваргүй нийлүүлнэ.
• Арьс ширний 60 нэр төрлийн бүтээгдэхүүнийг 7 тэрбум орчим ам.долларын зах зээлд нийлүүлэх боломжтой. 
• 204 нэр төрлийн ноос, ноолууран бүтээгдэхүүнийг таван улсын зах зээлд гаалийн татваргүй борлуулах боломж бүрдэнэ. Эдгээр таван улсын ноос ноолууран бүтээгдэхүүний зах зээл нь 7.5 тэрбум ам.доллар. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Мөн хөдөө аж ахуйн гаралтай бүтээгдэхүүн, сүү цагаан идээ, өлөн гэдэс, дотор, малын өөх тос, чацаргана, төмс гэх зэрэг 633 нэр төрлийн бараа бүтээгдэхүүнийг 15-50 хувийн гаалийн татваргүйгээр 200 орчим сая хүнтэй зах зээлд нийлүүлэх боломж бүрдүүлж байна. 

Харин ЕЭЗХ-ноос орж ирэх бараа бүтээгдэхүүнийг найман оронтой үндэсний кодоор задалж үзэхэд 511 бараа бүтээгдэхүүн болж байгаа.

• Хүнсний 89 төрлийн бараа бүтээгдэхүүн. Эдгээрийг одоо ч Монгол Улс импортоор авдаг.
• Эрдэс химийн шинж чанартай 47 бүтээгдэхүүн
• Аж үйлдвэрийн зориулалтай 181 бүтээгдэхүүн болон бусад төрлийн барааг манай улсад нийлүүлэхэд гаалийн таван хувийг татвараас чөлөөлөгдөх юм" хэмээн танилцуулав.

"Бид өөрсдөө хэлэлцээр байгуулъя гээд хөөцөлдөж, идэвхтэй ажилласан. Монгол Улсад ашигтай учраас тэр"

Харин Байнгын хорооны хуралдааны үеэр Хүнс, хөдөө аж ахуй, хөнгөн үйлдвэрийн сайд Ж.Энхбаяр 375 барааны жагсаалтаас дотооддоо үйлдвэрлэдэг 19 нэр төрлийн бүтээгдэхүүнийг хасах санал гаргаж буйгаа мэдэгдсэн.

ЕЭЗХ-той байгуулах чөлөөт худалдааны түр хэлэлцээр эцэслэгдэх шатандаа ороод буй энэ үед жагсаалтад засвар оруулах орон зай үлдсэн эсэхийг тодруулахад ЭЗХЯ-ны Төрийн нарийн бичгийн дарга И.Батхүү "Хоёр талын ашиг сонирхол нийцсэн тохиолдолд л эцэслэгдэнэ. Монгол Улсад илүү ашигтай байдал үүснэ гэж үзсэний үндсэн дээр хэлэлцээр байгуулах гэж байгаа.

Өнгөрсөн хугацаанд ярилцсан бараа бүтээгдэхүүний жагсаалтад өөрчлөлт оруулах эрх нь УИХ-ын гишүүдэд бий. Танхим дээрээ хэлэлцээд аж ахуйн нэгжүүд саналаа өгч болно. Үүнийг нь нөгөө талтайгаа хэлэлцээд явахаар цаг хугацаа шаардлагатай. 

Сүүлийн 30 жилд худалдааны тэнцвэр алдагдаж, манай импорт нь дийлэнх, экспорт бага болсон. Энэ нөхцөл нь Монгол Улсад ашиггүй байна гээд бид өөрсдөө хэлэлцээр байгуулъя гээд хөөцөлдөж, идэвхтэй ажилласан. Монгол Улсад ашигтай учраас тэр" гэж хариулав.