• 12 сарын 1, Ням
|
|
Уншиж байна ...

"The Mongolz" дэлхийн аваргын "Elimination Stage"-д хоёр удаа шалгарсан Азийн анхны баг боллоо

Н.Эрхбаяр, iKon.mn
30 минутын өмнө
iKon.MN
Зураг зураг
hltv.org

Counter Strike-2 (CS2) тоглоомын энэ оны хоёр дахь Дэлхийн Аварга Шалгаруулах Тэмцээн (ДАШТ) буюу "Perfect World Shanghai Major 2024" хоёр дахь өдрөө Хятадын Шанхай хотод "Opening stage"-ийн тоглолтуудаар үргэлжилж байна. 

Нийт 1.2 сая ам.долларын шагналын сантай тус тэмцээн нь Open stage, Elimination Stage, Playoff Stage гэсэн гурван шатлалтайгаар арванхоёрдугаар сарын 15-н хүртэл зохион байгуулагдана. 
Шанхайд болж буй энэ удаагийн ДАШТ-д манай улсын "The MongolZ" баг "Open stage" шатнаас тоглож байна. Энэ шатанд 16 баг тойргийн журмаар өрсөлдөнө. Түрүүлж гурван удаа хожсон эхний найман баг Elimination Stage буюу дараагийн шатанд шалгарна, үлдсэн нь тэмцээнээ өндөрлүүлэх юм.

"The Mongolz" баг эхний шатны гурав дахь тоглолтоо "Во3" (гурван "map"-аар ялагчийг тодруулах) журмаар Германы "GamerLegion" багийн эсрэг хийж, 2:0-оор хожлоо.

Манай улсын баг өөрийн сонгосон "Mirage map" дээр довтлох талаасаа тоглолтыг эхлүүлж 8:4-өөр байраа сольсон. Улмаар хамгаалах талаасаа нэг л үеийг эсрэг багтаа алдсанаар 13:5-аар хожсон. Харин "GamerLegion" багийн сонгосон "Anubis map" дээр 13:2-оор илт давуу ялалт байгуулж чадлаа. 

Ийнхүү "The Mongolz"-ийн хөвгүүд Counter Strike-2 тоглоомын дэлхийн аваргын "Elimination Stage"-д хоёр удаа шалгарсан Азийн анхны баг болж, дахин нэг шинэ түүх бичлээ. Тэд "Open stage"-ийг гурван хожилтой дуусгаж байгаа юм.

Мөн ирэх оны зургаадугаар сард АНУ-д зохион байгуулагдах дэлхийн аваргад Ази тивээс гурван баг оролцох эрхийг хэвээр хадгалан үлдэж байна.

Тэдний хоёр дахь шатны тоглолтууд энэ сарын 5-аас эхлэх юм. "Elimination Stage"-д мөн адил 16 баг тойргийн журмаар тоглох бөгөөд түрүүлж гурван удаа хожсон найман баг дэлхийн аваргын сүүлийн шат руу дэвшинэ.