Өмнөд Солонгосын 10 компани тутмын 7 нь гадаадаас, тэр дундаа Монголоос ажилтан авах сонирхолтой гэв

Ажлын байр зуучлалын Сарамин, KoMate байгууллагуудын Өмнөд Солонгосын компаниудын дунд хамтран явуулсан санал асуулгын үр дүн өчигдөр нийтлэгджээ.

Тэдний судалгаанд хамрагдсан 557 компанийн 73.4 хувь нь гадаадын иргэдийг ажилд авахад бэлэн байгаагаа илэрхийлсэн байна.

Тэдгээрийн 44 хувь нь одоогоор ядаж нэг гадаад ажилтантай байгаа бөгөөд гадаад ажилтандаа 61 хувь нь “сэтгэл хангалуун”, 11.7 хувь нь “маш их сэтгэл хангалуун” гэж хариулжээ.

Гадаад ажилтан авах сонирхол нь Өмнөд Солонгосын хөдөлмөрийн зах зээлээс ажиллах хүч олоход хэцүү болсонтой холбоотой гэж судалгаанд оролцсон компаниуд хариулсан байна.

Гадаад ажилтан авах сонирхлоороо аж үйлдвэрлэлийн компаниуд 42.5 хувьтай тэргүүлж, үйлчилгээний компаниуд 16.1 хувь, олон улсын маркетингийн компаниуд 12 хувь, барилгын компаниуд 11.7 хувь, мэдээллийн технологийн компаниуд 8.6 хувьтай удаалжээ.

Ямар улсын ажиллах хүчийг илүү сонирхож байгааг асуухад компаниудын 31.3 хувь нь Вьетнам, 20 хувь нь Казахстан болон бусад Төв Азийн улсууд, 18.6 хувь нь Филиппин, 16.1 хувь нь Монгол, 8.8 хувь нь Америк, Канад, 8.6 хувь нь Япон, Энэтхэг гэж хариулсан байна.

Гадаад ажилтан авахад тулгардаг хамгийн том хүндрэлийг хэлний асуудал гэжээ.

Судалгаанд оролцсон компаниудын 50 хувь нь гадаадын ажиллах хүчийг татахын тулд Өмнөд Солонгос улс визийн нөхцөлөө таатай болгон өөрчлөх шаардлагатай гэж үзсэн байна.

Эх сурвалж: Korea Times