Б.Батцэцэг: Филиппин улсаас боловсрол, аялал жуулчлал, үйлчилгээ зэрэг салбарт ажиллах хүч авах боломжийн талаар ярилцсан

Гэрэл зургийг MPA агентлагийн онцгой зөвшөөрөлтэйгөөр ашиглав

Бүгд Найрамдах Филиппин Улсын Гадаад хэргийн сайд Энрике А.Манало наймдугаар сарын 3-6-ны өдрүүдэд Монгол Улсад албан ёсны айлчлал хийж байна. 

Өнөөдөр хоёр улсын Гадаад харилцааны сайд нар албан ёсны баримт бичигт гарын үсэг зурсныхаа дараа хамтарсан мэдээлэл хийв.

Тус айлчлал нь манай хоёр улсын хооронд 1973 онд дипломат харилцаа тогтоосноос хойш Бүгд Найрамдах Филиппин Улсын Гадаад хэргийн сайдын түвшинд Монгол Улсад хэрэгжүүлж буй анхны өндөр түвшний айлчлал юм.

Монгол Улсын Гадаад харилцааны сайд Б.Батцэцэг "Энэхүү түүхэн айлчлал нь Монгол, Филиппиний харилцаа, хамтын ажиллагааг шинэ агуулгаар баяжуулж, улс төрийн яриа хэлэлцээний давтамжийг нэмэгдүүлэх, харилцан итгэлцлийг бэхжүүлэх, иргэд хоорондын хэлхээ холбоог бататгахад чухал түлхэц болно гэдэгт итгэлтэй байна. 

Албан ёсны хэлэлцээний үеэр Филиппиний Засгийн газраас гамшгийн эрсдэлийг бууруулах, даван туулахад зориулж манай улсад хүмүүнлэгийн тусламж үзүүлэхээр шийдвэрлэснийг мэдэгдлээ. 

Монгол Улсын Засгийн газрын гишүүн болон Монголын Улаан Загалмайн Нийгэмлэгийн ерөнхийлөгчийн хувьд Филиппиний анд нөхдийн сайн санааны тусламжид чин сэтгэлийн талархлаа илэрхийлье. Уур амьсгалын өөрчлөлтөд өртөмтгий улсуудын хувьд манай хоёр улс цаашид уур амьсгалын өөрчлөлттэй тэмцэх, гамшгийн эрсдэлийг бууруулах, даван туулах чадавхыг сайжруулах чиглэлд хамтран ажиллах болно. 

Монгол Улс Зүүн Хойд Ази дахь чухал түнш, АСЕАН-ийн нөлөө бүхий гишүүн орон Бүгд Найрамдах Филиппин Улстай найрсаг харилцаа, хамтын ажиллагааг өргөжүүлэн хөгжүүлэхэд чухал ач холбогдол өгсөөр ирсэн. Өнгөрсөн онд бид дипломат харилцаа тогтоосны 50 жилийн ойгоо өргөн дэлгэр, ёслол төгөлдөр тэмдэглэснийг дурдахад таатай байна" гэв. 

Энэхүү айлчлалын хүрээнд хоёр улсын Гадаад Харилцааны Яам хоорондын хамтын ажиллагааны ойлголцлын Санамж бичгийг шинэчлэн байгуулсан байна. Мөн спорт, боловсрол, соёл, хөдөө аж ахуй, эрүүл мэнд, мэдээллийн технологи, хөдөлмөр, нийгмийн хамгааллын салбарт хамтын ажиллагаагаа өргөжүүлэхээр санал нэгджээ.

Сайд Б.Батцэцэг "Нийгмийн халамж, хөдөлмөр эрхлэлтийн хамтын ажиллагааны эрх зүйн үндсийг бүрдүүлэх, түүний дотор нийгмийн асрамж, үйлчилгээний салбарт хамтран ажиллах, Филиппин улсаас боловсрол, аялал жуулчлал, үйлчилгээ зэрэг салбарт ажиллах хүч авах чиглэлд хамтран ажиллах боломжийн талаар ярилцаж тохиролцсон. 

Манай хоёр улсын найрсаг харилцааны гүүр болсон иргэд хоорондын харилцааг нэмэгдүүлэх, аялал жуулчлалын салбарын хамтын ажиллагааг өргөжүүлэх хүрээнд иргэд харилцан визгүй зорчих тааламжтай нөхцөлийг улам сайжруулахад талууд цаашид хамтран ажиллана. Түүнчлэн эрүүл мэндийн салбарт хамтын ажиллагааг идэвхжүүлж, монгол эмч, эмнэлгийн ажилтнуудыг Филиппин улсад богино, дунд хугацаагаар мэргэжлийн сургалтад хамруулах, тэдний чадавхыг бэхжүүлэхэд хамтран ажиллахад Филиппиний тал бэлэн гэдгээ нотолсон" хэмээв.