Соёл, спорт, аялал жуулчлал, залуучуудын сайд Ч.Номин "Милан Кортина 2026" өвлийн олимпын багийн ахлагчаар томилогдлоо

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын Үндэсний Олимпын Хороо (МҮОХ)-ны Гүйцэтгэх зөвлөлийн хурал өнөөдөр Олимпик хауст боллоо.

Хурлаар "Парис 2024" олимпын наадмын мэдээлэл, баг тамирчдын зохион байгуулалтын тухай хэлэлцэв. 

Мөн ирэх оны хоёрдугаар сарын 7-ноос 14-ныг хүртэл үргэлжлэх БНХАУ-ын Харбин хотноо зохиогдох Азийн Өвлийн IX наадмын Монголын багийн ахлагчаар Монголын Хоккейн холбооны ерөнхийлөгч Б.Жавхланг томилсон бол “Милан Кортина 2026” Өвлийн XXV олимпын наадмын Монголын багийн ахлагчаар Соёл, спорт, аялал жуулчлал, залуучуудын сайд Ч.Номин ажиллахаар боллоо.

Сонирхуулахад "Парис 2024" зуны олимпын наадмын багийн ахлагчаар хотын дарга асан Д.Сумъяабазар сонгогдсон билээ.

Эх сурвалж: Монголын Үндэсний Олимпын Хороо